A Xunta de Goberno da cidade de Santiago de Compostela, na sesión ordinaria que tivo lugar o día 11 de marzo de 2016, adoptou o seguinte acordo:

a) Aprobar inicialmente a modificación puntual do PERI-2 (Conxo de Arriba) no ámbito da AEI-E, segundo o proxecto presentado por Ríos Sánchez e Hijos Promociones, S.L., con data do 1 de marzo de 2016.

b) Someter o expediente a información pública durante o prazo de dous meses, mediante anuncios que para o efecto se publicarán no Diario Oficial de Galicia e en dous xornais dos de maior difusión na provincia.

Simultaneamente, practicarase notificación persoal aos propietarios das parcelas afectadas, segundo figuren no Catastro, e publicarase anuncio no Boletín Oficial del Estado co fin de que sirva de notificación do edicto aos titulares que non puidesen ser citados persoalmente, ben por ser descoñecidos, ignorarse o seu paradoiro ou por non atoparse no seu domicilio.

c) Durante o trámite de información pública solicitarase o informe da Dirección Xeral do Patrimonio Cultural sobre posibles afeccións á edificación catalogada sita no número 70 da rúa de Conxo de Arriba.

d) Como condición para a aprobación definitiva, deberase acreditar a aceptación dos propietarios que representen máis do 50 % da superficie da AEI-E.

A aprobación inicial determina automaticamente, por aplicación do disposto polo artigo 77.2 da LOUG, a suspensión do outorgamento das licenzas que poidan resultar incompatibles coa nova ordenación proposta no ámbito desta modificación, durante o prazo máximo de dous anos contado desde a aprobación inicial.

A documentación sometida a información pública comprenderá, ademais do proxecto de modificación inicialmente aprobado, o documento ambiental estratéxico presentado polo promotor con data do 13 de febreiro de 2015, a resolución do órgano ambiental pola cal se formula o Informe ambiental estratéxico e o resumo executivo exixido polo artigo 25.3 do Real decreto lexislativo 7/2015.

O que se publica co fin de que, durante o prazo de dous meses, contado a partir do día seguinte ao da publicación deste anuncio, os interesados poderán consultar o expediente no Servizo de Planeamento e Xestión e formular as alegacións que xulguen oportunas. Na páxina web do Concello www.santiagodecompostela.gal poderase consultar a documentación que se somete a información pública.

Santiago de Compostela, 21 de marzo de 2016

Martiño Noriega Sánchez
Alcalde