Descargar PDF Galego | Castellano| Português

DOG - Xunta de Galicia -

Diario Oficial de Galicia
DOG Núm. 60 Mércores, 30 de marzo de 2016 Páx. 11426

IV. Oposicións e concursos

Vicepresidencia e Consellería de Presidencia, Administracións Públicas e Xustiza

RESOLUCIÓN do 24 de febreiro de 2016, da Dirección Xeral de Administración Local, pola que se clasifican dous postos de traballo reservados a funcionarios/as con habilitación de carácter nacional na Deputación Provincial de Pontevedra.

A Deputación Provincial de Pontevedra formula proposta relativa á creación dos postos de vicesecretario/a e viceinterventor/a reservados a funcionarios/as con habilitación de carácter nacional pertencentes, respectivamente, ás subescalas de secretaría, categoría superior, e intervención, categoría superior, conforme o acordo adoptado polo Pleno da corporación provincial en sesión que tivo lugar o día 29 de decembro de 2015, sobre aprobación definitiva do orzamento para o ano 2016, cadro de persoal e relación de postos de traballo da Deputación Provincial de Pontevedra.

O artigo 2.g) do Real decreto 1732/1994, do 29 de xullo, establece que os postos de colaboración poden ser creados discrecionalmente polas corporacións locais e ser clasificados por proposta daquelas polo órgano competente da Comunidade Autónoma.

Por todo isto, en aplicación do establecido nos artigos 2 e 9 do Real decreto 1732/1994, do 29 de xullo, modificado polo Real decreto 834/2003, do 27 de xuño, e demais normativa concordante de aplicación, e no uso das facultades que lle confire o artigo 15.e) da Lei de emprego público de Galicia, en relación co artigo 241 da Lei 5/1997, do 22 de xullo, de Administración local de Galicia, e a Orde do 14 de maio de 2013, sobre delegación de competencias,

DISPÓN:

Primeiro. Clasificar os postos de traballo de vicesecretario/a e viceinterventor/a, reservados a funcionarios/as con habilitación de carácter nacional pertencentes respectivamente ás subescalas de secretaría, categoría superior, e intervención, categoría superior da Deputación Provincial de Pontevedra que se clasifica como se especifica no anexo que se xunta a devandita resolución.

Segundo. Contra esta resolución, que pon fin á vía administrativa, poderase interpoñer recurso potestativo de reposición perante a Vicepresidencia e Consellería de Presidencia, Administracións Públicas e Xustiza no prazo dun mes contado desde o día seguinte ao da súa publicación, de conformidade co establecido na Lei 30/1992, do 26 de novembro, ou poderá impugnarse directamente perante a xurisdición contencioso-administrativa, no prazo de dous meses contados desde a mesma data, segundo o disposto no artigo 46 en relación co 14 da Lei 29/1998, do 13 de xullo, reguladora da xurisdición contencioso-administrativa.

Santiago de Compostela, 24 de febreiro de 2016

José Alberto Pazos Couñago
Director xeral de Administración Local

ANEXO

Corporación: Deputación Provincial de Pontevedra.

Posto: vicesecretaría.

Subescala: secretaría.

Categoría: superior.

Forma de provisión: concurso.

Corporación: Deputación Provincial de Pontevedra.

Posto: viceintervención.

Subescala: intervención.

Categoría: superior.

Forma de provisión: concurso.