O Pleno da Deputación Provincial da Coruña, na sesión ordinaria do 30 de decembro do ano 2015, adoptou o acordo de aceptar a delegación de competencias para prestarlle servizos de control financeiro ao Concello de Boqueixón, do cal se procede a publicar o seu texto íntegro no BOP da Coruña para xeral coñecemento.

«Primeiro. Aceptar a delegación do exercicio das funcións de control financeiro sobre as subvencións pagadas en todos os exercicios pechados, iniciándose o dito control sobre as pagadas a partir do 1.1.2012.

Segundo. Aceptar a delegación da instrución e resolución dos expedientes de reintegro e sancionadores derivados dos informes de control financeiro que se emitan en virtude da delegación anterior, así como a liquidación e recadación, tanto en período voluntario coma en executivo, dos ingresos de dereito público resultantes.

Para este efecto, resultarán tamén de aplicación a esta delegación as bases para a prestación de servizos tributarios aos concellos da provincia.

Terceiro. Aceptar a delegación para que a Intervención emita informes de control financeiro sobre os seguintes servizos públicos, xestionados indirectamente mediante concesión administrativa:

– Contrato de xestión do servizo de abastecemento de auga.

– Contrato de xestión do servizo de sumidoiros e das fosas sépticas e mini depuradoras de augas residuais.

Cuarto. Non aceptar as seguintes delegacións por non axustarse ás bases para a prestación de servizos de control financeiro aos concellos de menos de 5.000 habitantes, por seren contratos de servizos e non contratos de xestión, os seguintes:

– Contrato do servizo de conservación, reparación e mantemento da luz pública de Boqueixón.

– Contrato do servizo de axuda no fogar.

Quinto. A vixencia das delegacións aceptadas no ámbito do control financeiro dos servizos públicos en xestión indirecta entrará en vigor tras a publicación do correspondente acordo e deberá manterse, como mínimo, durante dous anos, prazo que se poderá prorrogar tacitamente por períodos iguais conforme o establecido na base oitava das bases de delegación.

No caso de que algún servizo deixe de ser xestionado de maneira indirecta, a delegación non se entenderá producida tacitamente a esa nova forma de xestión.

Sexto. Publicar o acordo adoptado polo Pleno Provincial no Boletín Oficial da provincia e no Diario Oficial de Galicia.

Unha vez publicado, someterase a información pública durante un prazo de 30 días co obxecto de que se poidan presentar as reclamacións e suxestións que se consideren oportunas; estará á disposición dos interesados na Secretaría Provincial.

De non se presentaren reclamacións durante o período de exposición pública, entenderase aprobado definitivamente.

Sétimo. A delegación das competencias entrará en vigor unha vez que sexa publicado o acordo definitivo no Boletín Oficial da provincia, e o seu exercicio levarase a cabo nos termos establecidos nas bases para a prestación de servizos de control financeiro aos concellos de menos de 5.000 habitantes da provincia, aprobadas para o efecto pola Deputación Provincial».

A Coruña, 13 de xaneiro de 2016

Valentín González Formoso	Mª Amparo C.Taboada Gil
Presidente da Deputación Provincial da Coruña	Secretaria accidental da Deputación Provincial da Coruña