A Mesa do Parlamento de Galicia, na reunión do 12 de xaneiro de 2016,
DISPÓN:
Artigo único.
Modificación do Regulamento das distincións e condecoracións do Parlamento de Galicia:
Un. Modifícase o segundo parágrafo do artigo 7 do Regulamento das distincións e condecoracións do Parlamento de Galicia, que queda redactado da forma seguinte:
«Cando o membro da mesa remate na súa condición, recibirá unha reprodución en cor dourada da medalla que lle corresponda ao seu cargo institucional na mesa, e posteriormente poderaa lucir en todos aqueles actos protocolarios que organicen os servizos da Cámara».
Dous. Modifícase o artigo 12 do Regulamento das distincións e condecoracións do Parlamento de Galicia, que queda redactado da forma seguinte:
«Artigo 12
Xunto coa medalla, a persoa ou institución distinguida recibirá unha reprodución exacta dela en miniatura, como insignia ou broche prateados, e entregaráselle o correspondente título en pergameo para acreditar o outorgamento desta distinción, que será autorizado coa sinatura do presidente ou presidenta do Parlamento de Galicia».
Tres. Modifícase o punto «A insignia de deputada ou deputado» do anexo I do Regulamento das distincións e condecoracións do Parlamento de Galicia, que queda redactado da forma seguinte:
«ANEXO I
A insignia de deputada ou deputado
Realizada en prateado.
Diámetro total: 1,5 cm.
Grosor da insignia: 2 mm.
Grosor incluíndo o relevo: 2,5 mm».
Catro. Modifícase o anexo II do Regulamento das distincións e condecoracións do Parlamento de Galicia, que queda redactado da forma seguinte:
«ANEXO II
A medalla do Parlamento de Galicia
Materiais:
– Gravado en relevo.
– Aliaxe metálica.
– Chapado en dourado con detalles destacados en nácara ou porcelana.
Dimensións:
– Diámetro total: 7 cm.
– Grosor da medalla: 2 mm.
– Grosor incluíndo o bisel: 4 mm.
– Ancho do bisel: 0,15 mm».
Disposición derradeira única. Entrada en vigor
Esta modificación entrará en vigor o día seguinte ao da súa publicación no Diario Oficial de Galicia.
Santiago de Compostela, 12 de xaneiro de 2016
Miguel Ángel Santalices Vieira
Vicepresidente primeiro