Mediante Resolución do 27 de outubro de 2015, da Dirección Xeral da Función Pública do Ministerio de Facenda e Administracións Públicas, convocouse o concurso unitario de traslados para a provisión de postos de traballo reservados a funcionarios con habilitación de carácter nacional (BOE núm. 276, do 18 de novembro).
De acordo co disposto na base quinta da antedita resolución, en aplicación do artigo 3 do Decreto 103/2008, do 8 de maio, polo que se regula o coñecemento do galego nos procedementos para a provisión de postos de traballo reservados a funcionarios/as con habilitación de carácter nacional no ámbito territorial da Comunidade Autónoma de Galicia, os concursantes que non acrediten coa solicitude de participación no concurso estar en posesión do Celga 4 ou equivalente participarán nunha proba de galego eliminatoria.
No citado precepto establécese que a valoración da dita proba a realizará unha comisión técnica composta por tres persoas expertas na materia, e por cada membro titular nomearase un suplente.
Na súa virtude, vista a proposta realizada pola Secretaría Xeral de Política Lingüística, esta Dirección Xeral de Administración Local
DISPÓN:
Primeiro. Nomear as persoas que a continuación se relacionan membros da comisión técnica de valoración da proba do galego no concurso unitario de traslados para a provisión de postos de traballo reservados a funcionarios con habilitación de carácter nacional:
Titulares:
– Purificación Galán Boutureira
– Concepción Díaz Candán
– Xulio Loureiro González
Suplentes:
– Ruth Otero Villar
– Mónica Martínez Baleirón
– Ricardo Pita Fernández
Esta comisión terá a categoría primeira das previstas no Decreto 144/2001, do 7 de xuño. Establecerase un número máximo de asistencias que se percibirán de 3 por membro.
Segundo. Convocar os concursantes que non acreditaron xunto coa solicitude de participación no concurso unitario de traslados, convocado pola Resolución do 27 de outubro de 2015, estar en posesión do Celga 4 ou equivalente para a realización dunha proba eliminatoria de galego.
A relación de concursantes que deberá realizar a devandita proba exporase no taboleiro de anuncios da Dirección Xeral de Administración Local e na páxina web http://www.eidolocal.es .
Terceiro. A proba terá lugar o vindeiro día 11 de febreiro de 2016, ás 10.00 horas, na Escola Galega de Administración Pública, sita na rúa Madrid, nº 2, 4, Santiago de Compostela.
Os concursantes deberán ir provistos do DNI ou documento fidedigno acreditativo da súa identidade, a xuízo da comisión.
Non se permitirá o acceso ao lugar da proba con teléfono móbil, axendas ou demais dispositivos de carácter electrónico.
Santiago de Compostela, 2 de febreiro de 2016
José Alberto Pazos Couñago
Director xeral de Administración Local
