O Estatuto de autonomía de Galicia, no seu artigo 31, dispón que é competencia plena da Comunidade Autónoma galega o regulamento e administración do ensino en toda a súa extensión, niveis e graos, modalidades e especialidades, sen prexuízo do disposto no artigo 27 da Constitución e nas leis orgánicas que, conforme o punto primeiro do seu artigo 81, o desenvolven, e das facultades que lle atribúe ao Estado o artigo 149.1.30 da Constitución.

A Lei orgánica 2/2006, do 3 de maio, de educación, modificada pola Lei 8/2013, do 9 de decembro, para a mellora da calidade educativa, no seu artigo 63, determina que as ensinanzas deportivas teñen como finalidade preparar o alumnado para a actividade profesional en relación cunha modalidade ou especialidade deportiva, así como facilitar a súa adaptación á evolución do mundo laboral e deportivo e á cidadanía activa.

O Real decreto 1363/2007, do 24 de outubro, establece a ordenación xeral das ensinanzas deportivas de réxime especial e na súa disposición transitoria segunda, punto 1, indica que ata que non se creen os novos títulos e ensinanzas nas modalidades e especialidades baloncesto, balonmán, deportes de escalada, deportes de inverno e fútbol, que foron establecidos ao abeiro do disposto no Real decreto 1913/1997, do 19 de decembro, impartiranse conforme o previsto nos reais decretos que crearon os respectivos títulos e ensinanzas mínimas. Igualmente, na súa disposición transitoria terceira, punto 2, indícanse as normas que seguirán vixentes para o desenvolvemento destas ensinanzas, mentres non se publiquen outras que as substitúan.

En consecuencia, tendo en conta o informe da Dirección Xeral de Educación, Formación Profesional e Innovación Educativa e de conformidade coa proposta da Dirección Xeral de Centros e Recursos Humanos,

DISPOÑO:

Artigo 1. Actualización da oferta

Publícase a oferta educativa de ensinanzas deportivas a partir do curso 2015/16 en centros públicos da Comunidade Autónoma de Galicia, segundo os datos que figuran no anexo desta orde.

Artigo 2. Número mínimo de solicitudes

A posta en funcionamento destes estudos estará condicionada á existencia dun mínimo de dez alumnos/as matriculados/as na correspondente modalidade deportiva. A condición desta ratio mínima exixida debe poñerse en coñecemento do alumnado no momento da solicitude de matrícula.

Disposición adicional única. Autorización e matrícula

Sen prexuízo do establecido no artigo 2 desta orde, a Dirección Xeral de Educación, Formación Profesional e Innovación Educativa poderá autorizar, motivada e excepcionalmente, aquelas ensinanzas que non acaden o citado número mínimo de solicitudes de matrícula. Mentres non se dispoña desta autorización non se poderá formalizar matrícula ningunha.

Disposición derradeira primeira. Desenvolvemento normativo

Autorízanse a Dirección Xeral de Educación, Formación Profesional e Innovación Educativa e a Dirección Xeral de Centros e Recursos Humanos para adoptar todos os actos e medidas necesarias para a aplicación desta orde.

Disposición derradeira segunda. Entrada en vigor

Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 22 de setembro de 2015

Román Rodríguez González
Conselleiro de Cultura, Educación e Ordenación Universitaria

ANEXO

Centros				Ensinanzas
Código	Denominación	Concello	Provincia	Código	Denominación
15005749	IES Universidade Laboral	Culleredo	A Coruña	XM01003 XS01003	Ensinanzas técnico-deportivas de grao medio e superior en fútbol
27006541	IES Nosa Sra. dos Ollos Grandes	Lugo	Lugo	XM01005 XS01005	Ensinanzas técnico-deportivas de grao medio e superior en atletismo
27007259	IES Río Cabe	Monforte de Lemos	Lugo	XM01003 XS01003	Ensinanzas técnico-deportivas de grao medio e superior en fútbol
32015050	CIFP A Farixa	Ourense	Ourense	XM01004 XS01004	Ensinanzas técnico-deportivas de grao medio e superior en fútbol sala
36006717	IES Sánchez Cantón	Pontevedra	Pontevedra	XM01003 XS01003	Ensinanzas técnico-deportivas de grao medio e superior en fútbol
36006717	IES Sánchez Cantón	Pontevedra	Pontevedra	XM01006 XS01006	Ensinanzas técnico-deportivas de grao medio e superior en balonmán
36013771	IES Fermín Bouza Brey	Vilagarcía de Arousa	Pontevedra	XM01007 XS01007	Ensinanzas técnico-deportivas de grao medio e superior en baloncesto
36018999	IES As Barxas	Moaña	Pontevedra	XM01005 XS01005	Ensinanzas técnico-deportivas de grao medio e superior en atletismo
36002359	IES Antón Losada Diéguez	A Estrada	Pontevedra	LM01006 LS01006	Ensinanzas técnico-deportivas de grao medio e superior en salvamento e socorrismo