Para os efectos previstos no artigo 53 da Lei 7/2013, do 28 de xuño, de montes de Galicia, dáse publicidade ao acordo que o Xurado Provincial de Clasificación de Montes Veciñais en Man Común de Pontevedra, en sesión que tivo lugar o día 30 de xuño de 2015, adoptou en relación co deslindamento parcial entre as comunidades de montes veciñais en man común de Tameiga e a comunidade de Dornelas, no concello de Mos, respecto do linde común dos seus montes.
Antecedentes de feito:
Primeiro. A Lei 7/2012, do 28 de xuño, de montes de Galicia (DOG núm. 140, do 23 de xullo), na súa disposición derradeira segunda modifica o artigo 25 da Lei 13/1989, do 10 de outubro, de montes veciñais en man común, e elimina a obriga da Administración forestal de proceder ao deslindamento e sinalamento dos montes veciñais. Polo tanto, esta competencia corresponde ás comunidades propietarias, consonte os artigos 53 e 54 da Lei de montes de Galicia.
Segundo. Con data do 27.4.2015 a CMVMC de Tameiga comunica ao Xurado de MVMC de Pontevedra o acordo coa CMVMC de Dornelas de límites entre ambas as dúas comunidades. Logo de requirimento de documentación, consta no expediente a seguinte documentación, consonte o artigo 53 da Lei 7/2012: acto de conciliación no Xulgado de Mos, certificados de aprobación en asemblea xeral de ambas as dúas comunidades e cartografía dixital.
Terceiro. Con data do 4.6.2015, o xefe da sección de topografía informa: «trátase dun deslindamento parcial mediante acta de conciliación rexistrado no Xulgado de Paz de Mos que modifica o plano que consta no Rexistro de Montes Veciñais como correspondente á Sentenza do Tribunal de Xustiza de Galiza número 532/1991».
Cuarto. Coa presentación deste acordo de deslindamento elimínase a superficie solapada entre as CMVMC de Tameiga e a CMVMC de Dornelas (dúas parcelas de 0,6 ha e 0,3 ha cada unha) que se reflectiu no informe do 1.4.2003 da Área de Topografía do Servizo de Montes: «Que a superficie de solapamento entre as dúas solicitudes se debe a que na clasificación do monte Cotiño (da CMVMC de Dornelas) considérase límite leste como o correspondente ao reflectido nos planos do Concello de Mos. Mentres que na clasificación do monte Faquiña (da CMVMC de Tameiga), o límite sinalado corresponde ao límite sinalado que corresponde ao informe pericial do procedemento xudicial».
Quinto. Descrición da liña poligonal que determina o deslindamento de mutuo acordo do monte Faquiña, propiedade da CMVMC de Tameiga e o monte Cotiño, propiedade da CMVMC de Dornelas: segundo a acta de apeo descrita polo enxeñeiro operador Daniel de la Torre Rivero e formada polos seguintes puntos (UTM fuso 29 datum ED50):
|
Mouteira núm. 1 |
x=529.308,466 |
y=4.673.921,177 |
|
Mouteira núm. 2 |
x=529.344,881 |
y=4.673.862,149 |
|
Mouteira núm. 3 |
x=529.386,574 |
y=4.673.823,741 |
|
Mouteira núm. 4 |
x=529.385,759 |
y=4.673.851,624 |
|
Mouteira núm. 5 |
x=529.402,605 |
y=4.673.840,558 |
|
Mouteira núm. 6 |
x=529.423,892 |
y=4.673.832,295 |
|
Mouteira núm. 7 |
x=529.455,343 |
y=4.673.777,343 |
|
Mouteira núm. 8 |
x=529.474,125 |
y=4.673.659,788 |
|
Mouteira núm. 9 |
x=529.403,785 |
y=4.673.572,025 |
|
Mouteira núm. 10 |
x=529.469,521 |
y=4.673.521,424 |
|
Mouteira núm. 11 |
x=529.571,948 |
y=4.673.394,166 |
Por todo o exposto, emítese informe de xeito favorable ao deslindamento solicitado, xa que se eliminan as superficies solapadas entre a CMVMC de Tameiga e a CMVMC de Dornelas. Desta forma, o monte Faquiña queda delimitado de xeito correcto nos ventos norte, sur, leste e oeste.
Consideracións xurídicas:
Primeira. A Lei 7/2012, do 28 de xuño, de montes de Galicia, na súa disposición transitoria décimo cuarta establece que, para adecuar as avinzas realizadas con anterioridade á entrada en vigor desta lei ao procedemento de deslindamento entre montes veciñais en man común previstos nos artigos 53 e 54, deberán publicarse no Diario Oficial de Galicia as resolucións do xurado.
Segunda. Da documentación achegada polas comunidades e do informe técnico do Servizo de Montes desta xefatura territorial, conclúese que a avinza entre a CMVMC de Tameiga a CMVMC de Dornelas son congruentes coas respectivas resolucións de clasificación e cos lindes nelas descritos
Vista a avinza presentada, a documentación achegada con esta e o informe técnico do Servizo de Montes da Xefatura Territorial da Consellería do Medio Rural e do Mar en Pontevedra, este xurado, en atención ao disposto nos artigos 53, 54 e na disposición transitoria décimo cuarta da Lei 7/2013, de montes de Galicia, por unanimidade, acorda:
Primeiro. Aprobar a avinza realizada entre a CMVMC de Tameiga e a CMVMC de Dornelas (Mos) respecto do seu linde común nos termos indicados no antecedente de feito quinto e segundo os planos topográficos achegados e validados mediante informe técnico do Servizo de Montes
Segundo. Notificar este acordo ás comunidades propietarias afectadas e publicalo no Diario Oficial de Galicia para dar cumprimento ao disposto na Lei 7/2012, do 28 de xuño, de montes de Galicia.
Contra a presente resolución, que pon fin á vía administrativa, poderase interpoñer, con carácter potestativo, recurso de reposición ante o Xurado Provincial de Clasificación de Montes Veciñais en Man Común de Pontevedra no prazo dun mes, ou ben interpoñer directamente recurso contencioso-administrativo ante o Xulgado do Contencioso-Administrativo de Pontevedra, no prazo de dous meses contados desde o día seguinte ao da presente notificación, de acordo co disposto no artigo 116 da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Pontevedra, 28 de xullo de 2015
Miguel Ángel Pérez Dubois
Presidente do Xurado Provincial de Clasificación
de Montes Veciñais en Man Común de Pontevedra