O Concello Pleno, na sesión ordinaria que tivo lugar o día 21 de maio de 2015, aprobou inicialmente a modificación puntual ao Plan xeral de ordenación municipal de Mugardos para ampliar a cualificación dotacional de equipamentos do colexio Unión Mugardesa, redactado pola arquitecta municipal Olga Fra Gálvez, con data de decembro de 2014.

O que se fai público en cumprimento do disposto no artigo 85.2 da Lei 9/2002, do 30 de decembro, de ordenación urbanística e protección do medio rural de Galicia, para os efectos de que durante o prazo de dous (2) meses, contado a partir da publicación deste anuncio no Diario Oficial de Galicia, poidan formular as reclamacións e alegacións que consideren pertinentes.

Suspensión de licenzas.

Así mesmo, o Concello Pleno, na sesión ordinaria que tivo lugar o día 21 de maio de 2015, acordou a suspensión de licenzas de parcelación de terreos, edificación e demolición para a área determinada na dita modificación. O que se fai público en cumprimento do artigo 77 da Lei 9/2002, do 30 de decembro, de ordenación urbanística e protección do medio rural de Galicia.

Mugardos, 25 de maio de 2015

Xosé Fernández Barcia
Alcalde