De conformidade co disposto no artigo 59.5 da Lei 30/1992, do 26 de novembro, de réxime xurídico das administracións públicas e do procedemento administrativo común, e por razóns de economía e eficacia, notificáselles aos centros/entidades que se relacionan no anexo o requirimento de documentación para os efectos de comprobar o cumprimento dos requisitos establecidos na normativa vixente para manter a condición de centro/entidade inscrita ou acreditada no Rexistro de Centros e Entidades de Formación para o Emprego da Consellería de Traballo e Benestar, devoltos polo servizo de Correos por resultar descoñecidos os seus destinatarios ou porque, intentada a notificación, non se puido efectuar.

De acordo co disposto no Decreto 106/2011, do 19 de maio, polo que se crea o Rexistro de Centros e Entidades de Formación para o Emprego da Consellería de Traballo e Benestar e se regula o procedemento para a inscrición e, se é o caso, acreditación dos centros e entidades que impartan formación para o emprego no territorio da Comunidade Autónoma de Galicia (DOG nº 110), comunícaselles o seguinte:

1. A disposición transitoria primeira establece que os centros homologados con anterioridade á entrada en vigor do citado decreto, disporán dun prazo de dous anos para adaptar ás súas instalacións aos requisitos mínimos establecidos no artigo 30 da Orde TAS 718/2008, do 7 de marzo, e nesta norma.

2. Transcorrido o dito prazo, e para os efectos de comprobar o cumprimento dos requisitos establecidos na normativa vixente para manter a condición de centro/entidade inscrito ou acreditado no Rexistro de Centros e Entidades de Formación para o Emprego da Consellería de Traballo e Benestar, deberá no prazo de dez días, achegar a seguinte documentación (orixinais ou fotocopias compulsadas ou cotexadas):

– Documento que acredite a propiedade, arrendamento ou dereito de uso do inmoble, instalacións, equipamentos, talleres ou campos de práctica do centro ou entidade formativa.

– Planos oficiais das instalacións onde se imparta a formación. No caso de impartición de certificados de profesionalidade, os planos deberán estar visados polo colexio oficial correspondente.

– Escritura de constitución e estatutos da entidade segundo proceda.

– NIF/CIF.

– Licenza municipal de apertura como centro de formación ou a correspondente á súa actividade principal no caso de entidades. Na súa falta, solicitude dela. Neste último caso xuntarase, ademais, o certificado dun técnico colexiado competente na materia de que as instalacións reúnen as condicións hixiénicas, acústicas, de habitabilidade e de seguridade adecuadas como centro de formación e, ademais, o compromiso de presentar a resolución correspondente, unha vez que sexa emitida.

– Certificado (dun técnico colexiado competente na materia) de accesibilidade universal das instalacións de acordo coas exixencias recollidas no Real decreto lexislativo 1/2013, do 29 de novembro, polo que se aproba o texto refundido da Lei xeral de dereitos das persoas con discapacidade e da súa inclusión social, así como as súas normas de desenvolvemento.

3. De non achegar os documentos sinalados no prazo citado de 10 días, tramitarase a proposta para a súa baixa no rexistro de centros e entidades de formación, logo de resolución da directora xeral de Emprego e Formación que así o declare.

Ourense, 12 de xaneiro de 2015

José Selas Souto
Xefe territorial de Ourense

ANEXO