A Xunta de Goberno Local, na sesión ordinaria do 27 de novembro de 2014, adoptou, entre outros, o seguinte acordo.

23. Deslindamento de terreo de titularidade municipal lindeiro con terreos privativos das comunidades dos números 4, 6, 8, 10 e 12 da avenida de Marín.

A Xunta de Goberno Local, de conformidade coa proposta, por unanimidade dos asistentes (7 votos a favor) acordou:

1. Asumir na súa totalidade o contido do informe xurídico do 24 de novembro de 2014, que se terá por reproducido como integrante desta resolución para os efectos de motivación.

2. Proceder ao deslindamento da parcela sita na avenida de Marín, que se corresponde co predio rexistral 9.665 do Rexistro da Propiedade nº 2 de Ourense, segundo a seguinte descrición:

Parcela de terreo de forma en L irregular que, partindo desde a avenida de Marín, ten un primeiro tramo que se despraza cara ao leste, xirando este trazado cara ao sur á altura da esquina norte do edificio sito no número 8 da citada avenida, cun desenvolvemento lineal de 107 m ata o centro do predio matriz orixinal. A superficie total deste tramo de terreo, destinado ao servizo de paso ou tránsito a pé e rodado, é de 538 m2, cun largo continuo de 5 metros e un desenvolvemento perimetral de 224,82 metros.

Estremas:

Norte: en liña recta de 27,67 metros con terreos do Concello de Ourense, antes de Renfe.

Leste: en liña quebrada de 37,77 metros con resto de predio matriz do predio rexistral 10.855, en liña de 26,50 metros con parcela segregada nº 3 do predio rexistral 10.855 (bloque nº 12), 20 metros con parcela segregada nº 4 do predio rexistral 10.855 (bloque nº 10) e 4,96 metros con parcela segregada nº 5 do predio rexistral 10.855 (bloque nº 10).

Sur: en liña recta de 5 metros con resto do predio matriz da finca rexistral 10.855.

Oeste: en liña quebrada de 42,30 metros, 38,91 metros e 21,49 metros, respectivamente, co resto do predio matriz do predio rexistral 10.855, e en liña recta de 5,80 metros coa avenida de Marín.

3. Anunciar no Diario Oficial de Galicia, no Boletín Oficial da provincia e no taboleiro de anuncios deste concello a data para iniciar as operacións de deslindamento. Queda fixado para estes efectos o día 27 de marzo de 2015, ás 10.00 horas.

4. Facultar a concelleira delegada de Urbanismo para realizar todas as actuacións precisas para efectuar os trámites pertinentes para executar as operacións de delindamento.

5. Darlles traslado a Eduardo Moure Crespo, a Ricardo Portabales Fernández e aos demais interesados do informe xurídico do 24 de novembro de 2014.

Ourense, 28 de novembro de 2014

Áurea E. Soto Vázquez
Concelleira secretaria