Vista a solicitude presentada no 11 de novembro de 2013 por David Rodríguez Antuña, presidente da Asociación Galega de Fútbol Americano, inscrita co nº 2008/012033-1 (SC) no Rexistro Xeral de Asociacións da Vicepresidencia e Consellería de Presidencia, Administracións Públicas e Xustiza, para o recoñecemento do fútbol americano e o fútbol flag como modalidades deportivas na Comunidade Autónoma de Galicia,

Vista a existencia da Federación Española de Fútbol Americano, autorizada a súa constitución e inscrición no Rexistro de Asociacións Deportivas, en virtude de Resolución do 17 de maio de 2012 da Comisión Directiva do Consello Superior de Deportes, o que supuxo o recoñecemento implícito da modalidade deportiva do fútbol americano por parte do Consello Superior de Deportes, recoñecemento que xa levou consigo o exame das condicións, criterios e parámetros técnico-deportivos necesarios para que a citada actividade poida obter o estatus de modalidade deportiva,

Visto que o fútbol americano non aparece incluído como modalidade en ningunha federación deportiva galega e o futbol flag tampouco aparece como especialidade en ningunha federación deportiva galega,

Vista a implantación real da modalidade deportiva de fútbol americano e da especialidade de fútbol flag en Galicia, cun elevado número de practicantes na nosa comunidade,

Visto o artigo 5.1.k) da Lei 3/2012, do deporte de Galicia, que establece que corresponde á Administración autonómica recoñecer e cualificar novas modalidades e especialidades deportivas, así como establecer os criterios e requisitos para o seu recoñecemento,

RESOLVO:

Primeiro. Recoñecer como modalidade deportiva en Galicia o fútbol americano e como especialidade deportiva o fútbol flag, e autorizar a súa inscrición no Rexistro de Entidades Deportivas de Galicia.

Segundo. Ordenar a publicación desta resolución no Diario Oficial de Galicia para xeral coñecemento de todos os interesados.

Esta resolución esgota a vía administrativa e pódese interpor contra ela recurso potestativo de reposición ante o mesmo órgano que a ditou no prazo dun mes ou interpor directamente recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia no prazo de dous meses contados a partir do día seguinte ao da publicación desta no Diario Oficial de Galicia (artigos 116 e 117 da Lei 4/1999, do 13 de xaneiro, de modificación da Lei 30/1992, do 26 de novembro, de réxime xurídico das administracións públicas e do procedemento administrativo común).

Santiago de Compostela, 1 de decembro de 2014

José Ramón Lete Lasa
Secretario xeral para o Deporte