A Xunta de Goberno Local, en sesión ordinaria do 27 de outubro de 2014, acordou aprobar inicialmente o expediente expropiatorio, polo procedemento de taxación conxunta, para os efectos da obtención de terreos afectados pola acción IS-06, que afecta as parcelas catastrais 15042A003001800000KQ, 15042A003001820000KL, 2218204NH3921N0001GY, do Plan especial de infraestruturas de servizo do SXIS de abastecemento de auga e de saneamento de augas residuais do concello da Laracha, segundo o proxecto expropiatorio redactado para o efecto.

O proxecto de expropiación sométese a información pública polo prazo dun mes, mediante a inserción de anuncios no Diario Oficial de Galicia e nun xornal dos de maior circulación da provincia, cos documentos sinalados no artigo 143 da Lei 9/2002, do 30 de decembro, de ordenación urbanística e protección do medio rural de Galicia, para que aqueles que poidan resultar interesados formulen as observacións e reclamacións que consideren convenientes, en particular no que atinxe á titularidade ou valoración dos respectivos dereitos.

A Laracha, 18 de novembro de 2014

José Manuel López Varela
Alcalde