Dentro das actividades programadas para o ano 2014 e conforme as funcións atribuídas pola Lei 1/2007, do 15 de xaneiro, de creación da Academia Galega de Seguridade Pública, anúnciase a convocatoria das bases do segundo adestramento regulamentario para a seguridade no manexo das armas, dos/as policías locais de Galicia, que se deberá desenvolver de acordo coas seguintes bases:

Obxectivos.

– Facilitar o cumprimento do disposto no artigo 11.4 da Lei 4/2007, de coordinación de policías locais.

– Dispoñer de persoal actualizado nas prácticas de armamento e tiro policial de defensa.

– Controlar a práctica anual e regulamentaria do cadro de persoal, mediante un control e unha cartilla de tiro individual.

– Establecer distintos niveis para categorías de tirador segundo a seguridade e habilidade que demostren no manexo das armas.

Destinatarios/as.

A actividade vai dirixida aos funcionarios/as dos corpos da policía local da Comunidade Autónoma de Galicia que teñan interese en cumprir co disposto no artigo 11.4 de la Lei 4/2007, relativo a garantir unha adecuada preparación no uso do arma regulamentaria para o persoal dos corpos de policía local.

Solicitudes.

Os concellos interesados deberán remitir o formulario que se encontra na páxina web http://agasp.xunta.es/es á Academia Galega de Seguridade Pública; avenida da Cultura, s/n, A Estrada (Pontevedra), antes do día 5 de novembro de 2014.

As solicitudes poderán presentarse a través do fax da Agasp número 886 20 61 22, ou de acordo co previsto no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.

As solicitudes deberán estar autorizadas pola alcaldía, concellaría ou xefe de persoal, segundo proceda.

Todos aqueles concellos que adquirisen recentemente armas regulamentarias para a policía local terán preferencia para efectuar as prácticas regulamentarias, indispensables para un mellor coñecemento da nova arma e a adquisición da destreza suficiente para o seu manexo con seguridade e habilidade necesarias.

Medios.

Para o desenvolvemento da actividade, os alumnos deberán traer cada un a súa arma regulamentaria da dotación e a correspondente munición para as prácticas. A Academia Galega de Seguridade Pública nomeará os profesores e instrutores necesarios.

Determinación da data das prácticas.

A segunda práctica do plan anual terá lugar os días 18, 20, 24, 27 de novembro e 1 de decembro, das 10.30 ás 20.00 horas; 18, 25 de novembro e 2 de decembro, das 9.30 ás 15.00 horas, e 19, 26 de novembro e 3 de decembro, das 15.00 a 20.00 horas.

Configurado o calendario segundo as solicitudes recibidas comunicarase aos concellos coa finalidade de que, pola súa vez, informen con antelación suficiente da relación nominal do persoal participante na práctica.

Control e cartilla de tiro.

O control das prácticas do persoal xestionarano conxuntamente a Academia Galega de Seguridade Pública e a persoa designada polo concello.

Estableceranse niveis segundo a categoría e habilidade que cada tirador mostre nos aspectos tanto de seguridade como no manexo coas armas, niveis aos cales irá accedendo paulatinamente cada policía, de ser o caso. Estes niveis constarán na cartilla ou documento de control que se dispoña para as prácticas de tiro, tal e como se indicaba na epígrafe anterior.

Lugar.

As prácticas desenvolveranse na galería de tiro da Academia Galega de Seguridade Pública, sita na avenida da Cultura, s/n, no concello da Estrada.

Modificacións.

A Academia Galega de Seguridade Pública poderá modificar o desenvolvemento do plan anual de actualización para adaptalo as necesidades da Administración e ás continxencias que poidan xurdir.

A Estrada, 21 de outubro de 2014

Santiago Villanueva Álvarez
Director xeral de Emerxencias e Interior