O Concello Pleno, en sesión que tivo lugar o día 16 de maio de 2014, adoptou o seguinte acordo:
«1) Acordar a aprobación inicial do Plan especial de protección e rehabilitación do barrio de Ferrol Vello, expediente de iniciativa municipal redactado pola entidade Oficina de Planeamento, S.A., en virtude da asistencia técnica contratada polo Concello.
2) O acordo de aprobación determinará a suspensión do outorgamento de licenzas no conxunto do ámbito do plan especial, conforme o establecido no artigo 77.2 da Louga, agás naqueles ámbitos onde simultaneamente se cumpran as condicións do planeamento vixente e as do plan aprobado inicialmente. No ámbito da declaración de conxunto histórico, a concesión de licenzas estará, asemade, limitada polos requirimentos e prescricións da autorización do artigo 47.1 da Lei 8/1995, do 30 de outubro, do patrimonio cultural de Galicia.
A suspensión de licenzas terá unha duración máxima de dous anos, contado desde a dita aprobación inicial e, en calquera caso, extinguirase coa aprobación definitiva do planeamento.
3) Someter o expediente ao trámite de información pública durante un mes, de acordo co disposto no artigo 86.1 da Louga, mediante anuncio que se publicará no DOG e en dous dos xornais de maior circulación da provincia, solicitar os informes sectoriais e facer as notificacións regulamentarias».
De conformidade co exposto, sométese o expediente a información pública durante o prazo dun mes contado a partir da data de publicación do presente anuncio do DOG.
Para estes efectos, terase á disposición do público un exemplar do expediente no Servizo de Urbanismo deste concello, na rúa María, nº 54, 5º andar, en horario de atención ao público, das 9.00 ás 14.00 horas, e poderán achegar as alegacións correspondentes no Rexistro Auxiliar de Urbanismo, sito no 3º andar, ou a través dos medios previstos para tales efectos na Lei 30/1992, do 26 de novembro.
Consonte o disposto no artigo 11.3 do Real decreto lexislativo 2/2008, do 20 de xuño, polo que se aproba o texto refundido da Lei do solo, xúntase un plano coa delimitación do ámbito.
Ferrol, 16 de xuño de 2014
Guillermo Evia Pérez
Concelleiro delegado de Urbanismo, Infraestruturas e Contratación
