Na sesión celebrada polo Xurado Provincial con data do 12 de xuño de 2014, figura o acordo seguinte:

Monte das Negradas (expediente 28/75), pertencente aos veciños da parroquia de Negradas, do concello de Guitiriz, clasificado polo Xurado con data do 31 de xullo de 1975. Como consecuencia da entrada en vigor da Lei 7/2012, de montes de Galicia, e coa finalidade de levar a cabo o establecido na disposición transitoria décimo terceira, con respecto á revisión de esbozos de montes veciñais en man común, o Xurado, na reunión celebrada o 17 de setembro de 2012, acordou solicitar do Servizo de Montes a realización de propostas de revisión e elaboración de cartografías actualizadas dos montes veciñais da provincia susceptibles de tal adecuación. Con data do 27 de maio de 2014 tivo entrada escrito presentado por Manuel Vázquez Ares, como presidente da xunta reitora do monte, no cal solicita que se proceda á revisión do esbozo conforme á documentación que xunta. Con data do 2 de xuño de 2014, o Servizo de Montes elabora unha proposta de novo esbozo para o monte das Negradas, co cal o monte queda cunha superficie de 776,68 hectáreas, de conformidade coa nova cartografía. Examinada a devandita proposta, o Xurado por unanimidade acorda aceptala e proceder á oportuna incorporación do esbozo ao expediente, e constancia a nivel do Rexistro de Montes Veciñais en Man Común, de conformidade con el.

Descoñecendo o nome e enderezo dos posibles titulares de dereitos e intereses sobre o referido monte, por medio do presente anuncio, e conforme o disposto no artigo 59.4 da Lei 30/1992, do 26 de novembro, de réxime xurídico das administracións públicas e do procedemento administrativo común, ponse no seu coñecemento o devandito acordo.

Lugo, 16 de xuño de 2014

José Ramón Losada Fernández
Presidente do Xurado Provincial de Clasificación
de Montes Veciñais en Man Común de Lugo