O Pleno do Concello de Oroso, en sesión ordinaria que tivo lugar o 29 de abril de 2014, aprobou definitivamente o estudo de detalle promovido pola Xunta de Compensación da área de repartición núm. 1, polígono 2 Río Carboeiro 1, cos seguintes pronunciamentos:
«Primeiro. Aprobar definitivamente o estudo de detalle promovido pola Xunta de Compensación da área de repartición núm. 1, polígono 2 “Río Carboeiro 1” co obxecto de readaptar as aliñacións no bloque de vivendas (parcelas 6A e 6B do proxecto de compensación), mantendo o seu volume, desprazándoo cara o interior do rueiro debido á existencia dunha tubaxe de gas que impide a construción próxima a el, sen alterar o resto dos parámetros urbanísticos do bloque.
Segundo. Notificarlle este acordo á xunta de compensación coa indicación que contra el cabe interpor recurso contencioso-administrativo no prazo de dous meses perante o Tribunal Superior de Xustiza de Galicia.
Terceiro. Publicar este acordo no Boletín Oficial da provincia da Coruña e no Diario Oficial de Galicia.
Cuarto. Darlle traslado deste acordo ao Servizo de Urbanismo do Departamento Territorial da Consellería de Medio Ambiente, Territorio e Infraestruturas da Delegación Territorial da Coruña da Xunta de Galicia e á Axencia de Protección da Legalidade Urbanística (artigo 56 da Lei 7/1985, do 2 de abril, reguladora das bases de réxime local; artigo 203 da Lei 5/1997, do 22 de xullo, de administración local de Galicia; artigo 92.5 da Lei 9/2002, do 30 de decembro, de ordenación urbanística e protección do medio rural de Galicia; e artigo 113.b) do Real decreto 2568/1986, polo que se aproba o Regulamento de organización, funcionamento e réxime xurídico das entidades locais)».
Contra o acordo de aprobación definitiva, que pon fin á vía administrativa, poderase interpoñer recurso contencioso-administrativo ante o Tribunal Superior de Xustiza de Galicia no prazo de dous meses contados desde o día seguinte ao da súa publicación.
O que se publica para os efectos do artigo 92.2 da Lei 9/2002, do 30 de decembro, de ordenación urbanística e protección do medio rural de Galicia.
Oroso, 13 de maio de 2014
Manuel Mirás Franqueira
Alcalde