En cumprimento do sinalado na base común 5 da Orde do 17 de marzo de 2014 (Diario Oficial de Galicia do 26 de marzo), pola que se convocaba concurso-oposición para o acceso ao corpo de profesores de ensino secundario e procedemento de adquisición de novas especialidades polo persoal funcionario de carreira do corpo de profesores de ensino secundario da Comunidade Autónoma de Galicia, esta dirección xeral

RESOLVE:

Primeiro. Nomear o tribunal que deberá xulgar a proba de acreditación do coñecemento da lingua galega nos procedementos selectivos de ingreso e acceso ao corpo de profesores de ensino secundario no anexo desta resolución.

Segundo. A localidade de actuación do citado tribunal farase pública na resolución desta dirección xeral en que o tribunal anunciará a hora e o lugar da realización da proba.

Terceiro. Quedan autorizadas as comisións de servizos dos membros do tribunal que necesiten desprazarse para o exercicio de tal función, e terán dereito a percibir as axudas e gastos de viaxes de acordo coa lexislación vixente. Os medios de locomoción usados serán calquera dos previstos no Decreto 144/2001, do 7 de xuño (Diario Oficial de Galicia do 25 de xuño), modificado polo Decreto 144/2008, do 26 de xuño (Diario Oficial de Galicia do 18 de xullo) que foi modificado polo Decreto 96/2011, do 5 de maio (Diario Oficial de Galicia do 30 de maio) e corrección de erros no Diario Oficial de Galicia do 1 de xuño, e a Resolución do 20 de xuño de 2008 (Diario Oficial de Galicia do 17 de xullo).

Santiago de Compostela, 7 de maio de 2014

José Manuel Pinal Rodríguez
Director xeral de Centros e Recursos Humanos

ANEXO
Tribunal titular-acreditación coñecemento do galego

Tribunal suplente-acreditación coñecemento do galego