A directora da Axencia de Protección da Legalidade Urbanística ditou, o 27 de marzo de 2014, comunicación no expediente de execución forzosa polas obras realizadas dentro da servidume de protección do dominio público marítimo-terrestre, consistentes na instalación de casetas e contedores, construción dun depósito de acumulación e muro no lugar da Pousa-Abanqueiro, termo municipal de Boiro (A Coruña).

Ao non poder realizarse a notificación a Montserrat Rodríguez Lavandeira desta comunicación, mediante esta cédula, e ao abeiro do disposto no artigo 59.5 da Lei 30/1992, de réxime xurídico das administracións públicas e do procedemento administrativo común (LRXPAC), notifícaselle á interesada a dita comunicación:

«Asunto: comunicación.

Expediente: SIL/12/2013 (S-2010/033-C).

O 4 de abril de 2011, a directora da Axencia de Protección da Legalidade Urbanística ditou resolución no expediente sancionador de referencia pola realización de obras dentro da servidume de protección do dominio público marítimo-terrestre, consistentes na instalación de casetas e contedores, construción dun depósito de acumulación e muro, no lugar da Pousa-Abanqueiro, no termo municipal de Boiro, provincia da Coruña, carecendo da preceptiva autorización.

No punto segundo da parte dispositiva desa resolución, ordenábaselles a José Manuel Guianzo Fernández, Antolín Rodríguez Seoane, Alfonso Rodríguez Seoane e Montserrat Rodríguez Lavandeira que procedesen á restitución das cousas e á súa reposición ao estado anterior á comisión da infracción, para cuxo efecto deberían proceder á retirada de todas as casetas e contedores instalados na parcela, así como á demolición das obras realizadas dentro da servidume de protección (depósito de acumulación e a parte do muro afectado), no prazo dun mes.

O 8 de marzo de 2013, Montserrat Rodríguez Lavandeira, actuando en nome propio e como representante dos ditos interesados, comunica que o 9 de marzo de 2012, puxo de manifesto que se retirarán as casetas e se demolerán as construcións, e que quedaba levantar parte do solo de cemento e retirar o entullo.

Practicada visita de inspección o 3 de setembro de 2013, ao lugar dos feitos, comprobouse que as casetas e o depósito de acumulación foron retirados e demolidas as obras do interior da parcela, realizadas dentro da servidume, coa excepción do muro de peche da parcela, que se mantén en todo o seu perímetro, polo que a orde de demolición e restitución dos bens afectados ao estado anterior ao inicio das actuacións non foi cumprida na súa totalidade.

Polo exposto, comunícaselles que no prazo de quince (15) días, contados a partir do día seguinte ao da súa notificación, deben culminar a restitución das cousas e a súa reposición ao estado anterior á comisión da infracción mediante a demolición da parte do muro de peche da parcela realizado dentro da servidume de protección, ata a completa restitución da legalidade vulnerada, e acreditalo a esta axencia. Son informados de que, en caso contrario, se continuará a execución forzosa da orde de demolición mediante a imposición de multas coercitivas, conforme o advertido aos interesados en cumprimento do artigo 107 da Lei de costas e 199 e 200 do seu regulamento, en relación cos artigos 93 e seguintes da Lei 30/1992».

Para que conste e lle sirva de notificación de comunicación á destinataria arriba indicada, en cumprimento do disposto no artigo 59.5º da citada Lei 30/1992, do 26 de novembro, expido e asino esta cédula.

Santiago de Compostela, 15 de abril de 2014

María Martínez Allegue
Directora da Axencia de Protección da Legalidade Urbanística