O Pleno do Concello de Salceda de Caselas, en sesión do día 8 de abril de 2014, adoptou o seguinte acordo:

«Primeiro. Aprobar definitivamente a modificación do Plan especial de reforma interior (PERI) da unidade de execución-02, sen modificacións respecto á inicialmente aprobada e sometida á información pública, e que afecta os terreos situados dentro do polígono catastral 32, cuxos lindes son:

– Ao leste, coa antiga estrada PO-410 e a estrada a Caldelas.

– Ao norte, coa Esfarrapada.

– Ao sur, coa estrada PO-410.

– Ao oeste, coa Feira.

Segundo. O acordo notificarase persoalmente a todos os interesados e publicarase no Diario Oficial de Galicia e no Boletín Oficial da provincia, no que se inserirá, así mesmo, a normativa urbanística aprobada. Esta publicación deberá realizarse no prazo dun mes desde a adopción da aprobación definitiva.

Terceiro. Comunicar o acordo de aprobación definitiva, en virtude do artigo 92.3 da Lei 9/2002, do 30 de decembro, de ordenación urbanística e protección do medio rural de Galicia, para os efectos oportunos, á Consellería de Medio Ambiente, Territorio e Infraestruturas, achegando unha copia autenticada de dous exemplares dilixenciados polo secretario do Concello do documento definitivamente aprobado. No anuncio de aprobación definitiva farase constar a remisión da documentación á Consellería.

Cuarto. Contra o acordo de aprobación definitiva poderase interpoñer directamente recurso contencioso-administrativo ante o Tribunal Superior de Xustiza de Galicia no prazo de dous meses, contado a partir do día seguinte ao da publicación deste anuncio».

O acto de aprobación definitiva da citada modificación do plan especial, xunto coa documentación sinalada no punto terceiro do acordo, foi comunicado á Consellería de Medio Ambiente, Territorio e Infraestruturas o 25 de abril de 2014, en cumprimento do disposto polo artigo 92.3 da Lei 9/2002, do 30 de decembro, de ordenación urbanística e protección do medio rural de Galicia (LOUG).

De acordo co sinalado no artigo 92.2 da citada lei, publicouse no Boletín Oficial da provincia de Pontevedra o 2 de maio de 2014 o texto íntegro da normativa.

Contra o acordo de aprobación definitiva da citada modificación puntual poderase interpoñer directamente recurso contencioso-administrativo ante o Tribunal Superior de Xustiza de Galicia, no prazo de dous meses contados a partir do día seguinte ao da publicación deste anuncio.

Salceda de Caselas, 28 de abril de 2014

Marcos David Besada Pérez
Alcalde