De acordo co disposto na disposición transitoria terceira da Lei 2/2010, do 26 de marzo, de medidas urxentes de modificación da Lei 8/2002, do 30 de decembro, de ordenación urbanística e protección do medio rural de Galicia, e na Instrución 2/2011, do 12 de abril, para a aplicación da citada disposición, sobre edificacións sen licenza, mediante Xunta de Goberno Local, do 9 de febreiro de 2012, declarouse incursa na situación legal de fóra de ordenación total a nave destinada a garaxe e taller de mantemento para vehículos propios, sita na estrada de Santo Adrián (referencia catastral 000400100NH19E0001UB), de acordo co solicitado por Autocares Pombo, S.L.
Para estes efectos, faise constar que a superficie de parcela é de 734 m2, sobre a que se atopa construída a nave dunha soa planta, cunha superficie construída de 296 m2.
De acordo co recollido na normativa e na instrución citadas, e para os efectos de tramitar ante o Servizo Provincial de Calidade e Avaliación Ambiental da Consellería de Medio Ambiente, Territorio e Infraestruturas a solicitude de cualificación ambiental da actividade, por medio deste edicto e segundo o previsto no artigo 8.3 do Decreto 133/2008, do 12 de xuño, polo que se regula a avaliación de incidencia ambiental, en relación co artigo 86 da Lei 30/1992, do 26 de novembro, de réxime xurídico das administracións públicas e do procedemento administrativo común, sométese o expediente a información pública, durante o prazo de vinte días, contado a partir do seguinte ao da última publicación do anuncio no Diario Oficial de Galicia, no Boletín Oficial da provincia, e no taboleiro de anuncios do Concello, para que os que se consideren afectados dalgunha maneira pola actividade poidan facer as observacións pertinentes.
O expediente completo permanecerá exposto nos servizos urbanísticos deste concello de luns a venres, das 9.00 ás 14.00 horas.
Malpica de Bergantiños, 19 de febreiro de 2014
Miguel Ángel Fernández Mirás
Alcalde en funcións