Para os efectos previstos na Lei 16/2002, do 1 de xullo, de prevención e control integrados da contaminación (BOE nº 157, do 2 de xullo), faise público que por espazo de trinta (30) días hábiles, contados a partir do seguinte ao da publicación deste anuncio no Diario Oficial de Galicia, quedará exposta a seguinte documentación:
– «Solicitude de autorización ambiental integrada: proxecto de ampliación e reforma de explotación porcina. General Ganadera Gallega, S.A. Vilarullo-Teixeiro-Curtis-A Coruña».
Co fin de que calquera interesado poida consultala e, se for o caso, formular no dito prazo as alegacións, suxestións ou observacións que considere convenientes. O citado documento estará á disposición dos administrados, en horario de atención ao público, nas seguintes dependencias:
– Secretaría Xeral de Calidade e Avaliación Ambiental-Servizo de Prevención e Control Integrados da Contaminación (r/ San Lázaro, s/n, 15781 Santiago de Compostela).
– Xefatura Territorial da Coruña da Consellería de Medio Ambiente, Territorio e Infraestruturas (r/ Vicente Ferrer, 2, 15008 A Coruña).
– Concello de Curtis (praza de España, 1, Teixeiro, 15310 Curtis, A Coruña).
Ademais, poderán consultalos na páxina web da Consellería de Medio Ambiente, Territorio e Infraestruturas (http://www.cmati.xunta.es/ >>medio ambiente e sostibilidade >>prevención e control de actividades>>autorización ambiental integrada >>proxectos en información pública).
Santiago de Compostela, 11 de decembro de 2013
Justo de Benito Basanta
Secretario xeral de Calidade e Avaliación Ambiental
ANEXO
Memoria resumo
Nº de rexistro da autorización ambiental integrada: 2007/0038_NAA/IPPC_181.
Clave do expediente de modificación: 2013-IPPC-M-27.
Peticionaria: General Ganadera Gallega, S.A.
Domicilio social: Finca do Campo-Vilarullo-Teixeiro, 15310 Curtis (A Coruña).
Localización das instalacións: Finca do Campo-Vilarullo-Teixeiro. Un punto de localización das instalacións é o definido polas coordenadas UTM X 576.598; Y 4.775.956.
Actividade: explotación porcina destinada á produción de leitóns de ata 20 kg de peso vivo.
Descrición do proxecto: a explotación referida conta actualmente con nove naves con capacidade para 1.800 porcas reprodutoras e os seus leitóns ata 20 kg, un edificio de servizos, nave cargadoiro, lazareto, sala de caldeiras e cadros eléctricos, caseta de centro de transformación, depósito de almacenamento de auga potable, equipamentos de presión, dúas balsas exteriores de almacenamento de xurro, separador de fracción sólido-líquido de xurro e fosa de formigón onde se fai a extracción do xurro para o seu aproveitamento como fertilizante órgano-mineral en parcelas agrícolas, e será ampliada e reformada para un incremento da capacidade produtiva de ata 2.400 porcas reprodutoras, para o cal será necesaria a construción de tres naves máis e a reforma interior dunha das existentes para a súa adaptación a parideiras. Ademais, adecuarase unha balsa exterior existente na explotación, ata o momento inutilizada, para almacenar o incremento de xurro que se producirá anualmente na explotación con motivo do incremento da capacidade produtiva.
Ciclo produtivo: tendo en conta posibles tardanzas de entrada en celo, así como posibles fallos na inseminación, nesta explotación preveuse destetar 52.440 leitóns de 6 kg de peso vivo, a razón de 9,50 leitóns por porca, e que saian da explotación con destino a cebadoiros externos 49.200 leitóns de 20 kg de peso vivo. O número estimado de roladas destetadas por porca produtiva e ano é de 2,30.
A recolla das dexeccións sólidas e líquidas dos animais, así como as augas de limpeza, faise directamente sobre as fosas de xurro existentes en todas as naves da explotación, situadas debaixo dos distintos aloxamentos e a través das correspondentes grellas. Estas fosas parciais contan coas pendentes correspondentes para o seu baleiramento por gravidade e comunícanse mediante arquetas de bóla e rexistros cos colectores que as dirixen ata as balsas exteriores de almacenamento de xurro. As augas residuais orixinadas en aseos e vestiarios son conducidas á fosa de formigón para almacenamento de xurro existente na explotación, desde onde son conducidas posteriormente ás balsas de almacenamento de xurro.