Visto o expediente para outorgamento de autorización administrativa e aprobación do proxecto de execución da instalación eléctrica que a continuación se describe:
Solicitante: Mercartabria, S.L.U.
Domicilio social: polígono Piadela, s/n, 15200 Betanzos.
Denominación: CS e CT de 250 kVA para supermercado.
Situación: rolda de Outeiro, 142-144, A Coruña.
Características técnicas: centro de seccionamento formado por cela de entrada, cela de saída e cela de liña, 15 kV. Centro transformador de 250 kVA, 15 kV, refrixeración en aceite.
Cumpridos os trámites ordenados na Lei 54/1997, do 27 de novembro, do sector eléctrico e no capítulo II, título VII do Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica, esta xefatura territorial resolve:
Autorizar e aprobar o proxecto de execución das ditas instalacións, cuxas características se axustarán en todas as súas partes ás que figuran nel e ás condicións técnicas e de seguridade establecidas nos regulamentos de aplicación e nos condicionados establecidos polos ministerios, organismos ou corporacións que constan nos expedientes.
Contra a presente resolución poderá interpor recurso de alzada ante o conselleiro de Economía e Industria no prazo dun mes contado a partir do día seguinte ao da notificación desta resolución; tamén poderá interpor calquera outro recurso que considere pertinente ao seu dereito.
A Coruña, 7 de novembro de 2013
Susana Vázquez Romero
Xefa territorial da Coruña