Dentro do procedemento de oficio seguido en relación coa oficina de farmacia, con sigla C-296-F, situada na rúa Arcai, núm. 81, Bembibre, da zona farmacéutica de Val do Dubra, titularidade de Jesús J. Barrio Ibáñez, o pasado 6 de xuño de 2013 a Secretaría Xeral Técnica da Consellería de Sanidade, de acordo coas competencias que lle confire o Decreto 146/2001, do 7 de xuño, sobre planificación, apertura, traslado, peche e transmisión de oficinas de farmacia, acordou o peche definitivo forzoso da devandita oficina de farmacia.
Dentro das actuacións tendentes a lograr a efectividade do dito acordo, o pasado 11 de novembro de 2013, persoal da Xefatura Territorial da Consellería de Sanidade do Departamento Territorial da Coruña, inspeccionou o local en que se atopaba a dita oficina co obxecto de comprobar o estado dos medicamentos e produtos sanitarios que había no seu interior, así como para adoptar as medidas pertinentes en relación cos devanditos medicamentos e produtos sanitarios.
Así mesmo, procedeuse á clasificación e realización dun inventario dos medicamentos e produtos sanitarios atopados e, dado que actualmente o local carece da preceptiva autorización administrativa para o almacenamento e depósito de medicamentos, acordouse o seu depósito temporal nas dependencias da Cooperativa Farmacéutica Galega (Cofaga), situadas no polígono de Pocomaco, parcela A-4, do concello da Coruña.
De conformidade co disposto no artigo 59.5 da Lei 30/1992, do 26 de novembro, de réxime xurídico das administracións públicas e do procedemento administrativo común, por ignorarse o lugar da notificación, póñense estes feitos en coñecemento dos herdeiros de Jesús J. Barrio Ibáñez e demais interesados para que poidan comparecer no expediente e nun prazo de quince días, contados desde o seguinte ao da publicación deste anuncio, formulen as alegacións que xulguen pertinentes na defensa dos seus intereses.
Santiago de Compostela, 15 de novembro de 2013
Antonio Fernández-Campa García-Bernardo
Secretario xeral técnico da Consellería de Sanidade
