O Servizo Galego de Saúde, no desenvolvemento da súa obriga de garantir a calidade dos procedementos e a seguridade dos pacientes, debe velar por que a actividade que se realiza en todos os seus servizos teña as mellores garantías de éxito e acade un volume mínimo de casos que permita o mantemento da experiencia dos/as profesionais que realizan os procedementos e reforce a súa configuración para garantir a atención continuada nos termos máis axeitados.
Así, e partindo dunha situación actual con catro unidades de cirurxía pediátrica existentes nos complexos hospitalarios Universitarios da Coruña, Santiago, Vigo e Ourense, e tendo constatada unha baixa demanda actual de procedementos de cirurxía pediátrica que se realizan no ámbito da Estrutura Organizativa de Xestión Integrada (EOXI) de Ourense, Verín e O Barco de Valdeorras, o Servizo Galego de Saúde acorda a creación dunha Área de Servizo Compartido para a prestación de cirurxía pediátrica que cubra a área sur de Galicia, configurada polo ámbito das estruturas organizativas de xestión integrada de Ourense, Verín, O Barco de Valdeorras e Vigo.
Esta Área de Servizo Compartido integrará funcionalmente as unidades de cirurxía pediátrica existentes nos actuais complexos hospitalarios universitarios de Ourense e Vigo.
Esta fórmula organizativa ten o seu amparo normativo na Lei 8/2008, de saúde de Galicia, que, no seu artigo 32, establece como principios reitores do Sistema público de saúde de Galicia potenciar o traballo e a cooperación interhospitalaria, achegar os servizos aos cidadáns e promover a equidade no acceso ás prestacións sanitarias. Asemade, o artigo 97 aposta por modelos de xestión dinamizadores do servizo público a través de fórmulas organizativas integradoras de procesos asistenciais utilizando medidas que fomenten a coordinación, colaboración e cooperación, superando a compartimentación existente entre hospitais.
Así mesmo, o modelo que se propón está en consonancia co disposto no Decreto 37/2001, do 1 de febreiro, de áreas de servizo compartido en estruturas hospitalarias do Servizo Galego de Saúde, que establece, entre outros fins, procurar o aproveitamento do potencial dos recursos asistenciais presentes nos hospitais públicos, co obxecto de mellorar a calidade da asistencia sanitaria prestada. A publicación do devandito decreto creou un marco de actuación que permite a aplicación de técnicas que optimizan a asignación de recursos, axilizan o acceso aos servizos e melloran a satisfacción dos cidadáns.
Finalmente, cómpre subliñar que coa posta en marcha desta área se pretende xerar unha estrutura organizativa asistencial de calidade, capaz de mellorar aspectos da organización existente ata o de agora, creando un modelo estruturado, flexible e adaptado aos centros, promovendo unha organización de servizos máis integrada e compartindo, de forma máis eficiente, os recursos públicos, profesionais e técnicos, para a realización dos procedementos de cirurxía pediátrica coas maiores garantías de calidade e seguridade para os pacientes.
Por todo iso, ao abeiro do disposto na Lei de saúde de Galicia, elaborado o plan asistencial da citada área de servizo compartido en colaboración coas xerencias das EOXI correspondentes, e unha vez emitido informe favorable da Dirección Xeral de Asistencia Sanitaria,
RESOLVO:
A creación da Área de Servizo Compartido de Cirurxía Pediátrica da área sur de Galicia, aunando os correspondentes recursos das EOXI de Ourense,Verín, O Barco de Valdeorras e Vigo.
Santiago de Compostela, 12 de novembro de 2013
Mª Nieves Domínguez González
Xerente do Servizo Galego de Saúde