Por Resolución da Dirección de Recursos Humanos do Servizo Galego de Saúde do 21 de setembro de 2012 (DOG nº 186, do 28 de setembro) abriuse o prazo para a inscrición de aspirantes nas listas para a formalización de vinculacións temporais no ámbito das institucións sanitarias do Servizo Galego de Saúde e entidades adscritas á Consellería de Sanidade, nas seguintes categorías estatutarias:

1. Fisioterapeuta.

2. Terapeuta ocupacional.

3. Técnico/a superior en documentación sanitaria.

4. Técnico/a superior en dietética e nutrición.

5. Técnico/a en farmacia.

Na devandita resolución preveuse unha xeración de listas coas persoas inscritas ata o 31 de outubro de 2012 que cumpran os requisitos determinados na citada resolución.

Por Resolución do 9 de abril de 2013 (DOG nº 79, do 24 de abril) publicáronse as listas provisionais dos/das aspirantes admitidos/as e excluídos/as daquelas categorías estatutarias.

Finalizado o prazo de emenda contra a dita resolución e analizadas as reclamacións presentadas, este centro directivo, de conformidade coa base décima da resolución de inicio do prazo de inscrición (DOG nº 186, do 28 de setembro),

RESOLVE:

Primeiro. Publicar a relación definitiva de solicitantes admitidos/as e excluídos/as e os resultados provisionais de baremación no proceso de inscrición de aspirantes para a formalización de nomeamentos estatutarios temporais no ámbito do Servizo Galego de Saúde e entidades adscritas á Consellería de Sanidade, nas categorías de fisioterapeuta, terapeuta ocupacional, técnico/a superior en documentación sanitaria, técnico/a superior en dietética e nutrición e técnico/a en farmacia.

Segundo. As listas definitivas de excluídos/as e a lista definitiva de admitidos/as coa asignación da puntuación provisional e máis o número de orde acadados atópanse publicadas, á disposición das persoas interesadas, na páxina web do Servizo Galego de Saúde (www.sergas.es).

Ademais, o estado de cada solicitude pode ser consultado polo/a solicitante no seu expediente electrónico persoal en Fides/expedient-e/sección de procesos.

Terceiro. De conformidade coa base décima da Resolución do 21 de setembro de 2012, contra a lista definitiva de admitidos/as e excluídos/as, que pon fin á vía administrativa, as persoas interesadas poderán interpoñer recurso contencioso-administrativo no prazo de dous meses contados a partir do día seguinte ao da súa publicación, ante o xulgado do contencioso-administrativo competente, de conformidade co establecido na Lei 29/1998, do 13 de xullo, reguladora da xurisdición contencioso-administrativa. Potestativamente, e con carácter previo, poderán interpoñer recurso de reposición ante a Dirección Xeral de Recursos Humanos do Servizo Galego de Saúde no prazo dun mes contado desde o día seguinte ao da súa publicación.

As persoas admitidas, con respecto aos resultados da baremación, poderán presentar reclamación ante as direccións das estruturas organizativas de xestión integrada e direccións con competencias en xestión do persoal no suposto de entidades adscritas á Consellería de Sanidade, no prazo de dez días naturais contados a partir do seguinte ao da súa publicación.

As reclamacións presentadas entenderanse estimadas ou desestimadas na resolución pola que se publiquen as puntuacións e a orde de prelación definitivas.

Santiago de Compostela, 6 de novembro de 2013

Margarita Prado Vaamonde
Directora xeral de Recursos Humanos