DOG 147 do 2/08/2013 - ORDE do 31 de xullo de 2013 pola que se fixa o importe do crédito dispoñible na convocatoria de 2013 para a concesión de axudas para proxectos ao abeiro dos plans estratéxicos zonais aprobados por esta consellería aos grupos de acción costeira, convocadas pola Orde do 16 de marzo de 2011 pola que se establecen as bases e se regula o procedemento da súa concesión (con financiamento do Fondo Europeo da Pesca).

III. Outras disposicións

Consellería do Medio Rural e do Mar

ORDE do 31 de xullo de 2013 pola que se fixa o importe do crédito dispoñible na convocatoria de 2013 para a concesión de axudas para proxectos ao abeiro dos plans estratéxicos zonais aprobados por esta consellería aos grupos de acción costeira, convocadas pola Orde do 16 de marzo de 2011 pola que se establecen as bases e se regula o procedemento da súa concesión (con financiamento do Fondo Europeo da Pesca).

A Orde do 16 de marzo de 2011 (DOG nº 57, do 22 de marzo) modificada pola Orde do 5 de xullo de 2012 (DOG nº 143, do 27 de xullo) establece as bases reguladoras para a concesión de axudas para proxectos ao abeiro dos plans estratéxicos zonais aprobados pola Consellería do Medio Rural e do Mar aos grupos de acción costeira (con financiamento do Fondo Europeo de Pesca).

O artigo 10 da citada orde establece que a presentación das solicitudes mantense aberta ata o 31 de marzo de 2013, e nel establécense os períodos anuais de resolución.

O artigo 9 da citada orde establece que as axudas se concederán con cargo ás aplicacións orzamentarias que en cada un dos anos de vixencia do actual programa operativo FEP 2007-2013 sinale a correspondente lei de orzamentos xerais da Comunidade Autónoma.

En cada anualidade sucesiva ata 2013 fixarase mediante unha orde complementaria o crédito plurianual existente con esta finalidade. Os créditos de cada ano poderán ser incrementados, se é o caso, coas incorporacións dos remanentes de exercicios anteriores que legalmente correspondan.

Aprobados os orzamentos da Comunidade Autónoma de Galicia para 2013 pola Lei 2/2013, do 27 de febreiro, cómpre facer pública a contía do crédito orzamentario destinado a facer fronte ás ditas axudas.

Para tal obxecto, esta consellería

DISPÓN:

Artigo 1. Crédito orzamentario de 2013

O crédito orzamentario para as solicitudes de axuda tramitadas durante o exercicio do ano 2013 e a plurianualidade asociada ás axudas que poidan concederse neste alcanza o importe de dez millóns novecentos vinte e dous mil catrocentos setenta e seis euros con cinco céntimos (10.922.476,05 euros), repartidos nas seguintes anualidades e partidas orzamentarias:

Partida orzamentaria	Ano 2013	Ano 2014	Ano 2015	Totais
12.31.723B.770.0	3.030.814,46 €	1.685.000,00 €	1.283.469,60 €	5.999.284,06 €
12.31.723B.780.0	1.792.136,79 €	1.625.952,80 €	1.505.102,40 €	4.923.191,99 €
Totais	4.822.951,25 €	3.310.952,80 €	2.788.572,00 €	10.922.476,05 €

As axudas financiaranse con cargo ao Fondo Europeo da Pesca (75 %), a fondos da Administración xeral do Estado e a fondos da Comunidade Autónoma de Galicia.

Artigo 2. Ampliación do crédito

A contía establecida no artigo anterior para a anualidade 2013 poderá ser incrementada na cantidade resultante das incorporacións de créditos remanentes doutros exercicios.

Artigo 3. Concesión das axudas

A concesión de axudas quedará limitada, en todo caso, ás dispoñibilidades orzamentarias.

Disposición derradeira única. Entrada en vigor

Esta orde producirá efectos desde o día seguinte ao da súa publicación no Diario Oficial de Galicia.

Santiago de Compostela, 31 de xullo de 2013

Rosa María Quintana Carballo
Conselleira do Medio Rural e do Mar