O artigo 57 da Lei 58/2003, do 17 de decembro, xeral tributaria, sinala os medios que a Administración tributaria pode utilizar para calcular o valor das rendas, produtos, bens e demais elementos determinantes da obriga tributaria, entre os cales cita, na súa alínea c), o de prezos medios no mercado. Pronúnciase en idéntico sentido o artigo 27.Un do texto refundido das disposicións legais da Comunidade Autónoma de Galicia en materia de tributos cedidos polo Estado, aprobado polo Decreto lexislativo 1/2011, do 28 de xullo. Esta mesma lei detalla no seu artigo 27.Tres cales deben ser a forma e o contido da norma que desenvolva este medio de valoración.

Pola Orde do 27 de decembro de 2012, da Consellería de Facenda, desenvolveuse para o exercicio 2013 o medio de comprobación de prezos medios no mercado para que poida ser utilizado na aplicación dos tributos xestionados por esta comunidade autónoma cuxa base impoñible sexa o valor real dos bens inmobles. Así, establécese un criterio de valoración obxectivo, común e homoxéneo en todo o territorio, e explícase con detalle o sistema de cálculo utilizado.

O obxectivo desta modificación é actualizar os ditos valores e establecer os citados prezos medios para o que resta do exercicio 2013, mediante unha modificación deles á baixa, actuando tanto sobre o coeficiente de mercado como sobre o valor do solo.

De conformidade co disposto no artigo 42.3 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, cando o contido e a repercusión da disposición o aconsellen será sometida a información pública.

Na súa virtude,

RESOLVO:

Someter a información pública, por un prazo de quince (15) días hábiles contados desde o seguinte ao da publicación desta resolución, o proxecto de orde polo que se modifica a Orde do 27 de decembro de 2012 pola que se desenvolve o medio de comprobación de valores de prezos medios no mercado aplicable a determinados inmobles rústicos e urbanos situados na Comunidade Autónoma de Galicia, e se aproban os prezos medios no mercado aplicables no exercicio 2013.

O proxecto de orde poderase consultar na páxina web da Consellería de Facenda:
http://www.conselleriadefacenda.es/web/portal/disposicions.

As posibles alegacións presentaranse durante o prazo sinalado, dirixidas á secretaria xeral técnica e do Patrimonio, en calquera das oficinas previstas no artigo 38.4 da Lei 30/1992, do 26 de novembro, de réxime xurídico das administracións públicas e do procedemento administrativo común.

Santiago de Compostela, 11 de xullo de 2013

María del Socorro Martín Hierro
Secretaria xeral técnica e do Patrimonio