Con data do 22 de maio do 2013, o presidente de Portos de Galicia resolve autorizar a incoación do expediente de caducidade da concesión administrativa de referencia, e acorda designar como instrutor do expediente a Jesús Javier Fernández Barro, xefe da División Xurídica de Portos de Galicia, con domicilio para os efectos do presente expediente en Área Central, praza de Europa, 5-A, 6º, 15707 Santiago de Compostela. O seu réxime de abstención e recusación é o consignado nos artigos 28 e 29 da Lei 30/1992, do 26 de novembro, de réxime xurídico das administracións públicas e do procedemento administrativo común.

Intentada a notificación do acordo de incoación do expediente de caducidade no enderezo que consta no expediente sito na travesía da Coruña, número 4, oficina 8, de Vigo, provincia de Pontevedra, a través do servizo de Correos, e non sendo posible a súa práctica, de conformidade co disposto no artigo 59.4º da citada Lei 30/1992, notifícase mediante a publicación no Diario Oficial de Galicia e exposición no taboleiro de edictos do Concello de Vigo á mercantil Racionalización de Servicios Navales, S.L. (Rasernaval), o presente acordo de incoación de expediente de caducidade da concesión administrativa de referencia.

O expediente incóase por falta de pagamento da totalidade das taxas relativas á concesión liquidadas desde o outorgamento no ano 2011, na actualidade 35.763,04 euros están na vía executiva, e polo incumprimento do prazo de iniciación e remate das obras de reforma, o que implica o incumprimento das condicións xerais oitava, novena e décimo sétima do título concesional, e da particular cuarta, e a concorrencia das causas de caducidade previstas na condición xeral cuadraséximo, letras a) e b).

Contra o acordo de incoación poderanse formular alegacións, outorgándose a estos efectos un prazo máximo de 15 días contados desde o día seguinte ao da publicación do acordo no Diario Oficial de Galicia e exposición no taboleiro de edictos do Concello de Vigo.

Ao marxe do que resulte da instrución do procedemento en canto a outros motivos de caducidade que puidesen concorrer, o aboamento das cantidades debidas antes de ditar resolución implicará o arquivo do expediente no que atinxe a este motivo concreto de caducidade.

O órgano competente para a resolución do expediente é o presidente da entidade pública Portos de Galicia, en virtude das competencias conferidas polo artigo cuarto da Orde do 30 de marzo de 2012 da Consellería do Medio Rural e do Mar.

Para o seu exame, o expediente completo está nas dependencias dos servizos centrais de Portos de Galicia en Área Central, praza de Europa, 5-A, 6º, 15707 Santiago de Compostela.

E para que conste e sirva de notificación, e en cumprimento do disposto no artigo 59.4º da Lei 30/1992, do 26 de novembro, de réxime xurídico das administracións públicas e do procedemento administrativo común, expido, asino e selo a presente cédula.

Santiago de Compostela, 26 de xuño de 2013

Jesús Javier Fernández Barro
Instrutor