O Decreto 46/2012, do 19 de xaneiro, polo que se establece a estrutura orgánica da Consellería do Medio Rural e do Mar e do Fondo Galego de Garantía Agraria, dispón que esta é o órgano da Administración da Comunidade Autónoma ao cal lle corresponde desenvolver as competencias e funcións en materia de ordenación pesqueira en augas interiores, marisqueo, acuicultura, confrarías de pescadores e demais organizacións e asociacións de profesionais do sector, de acordo co establecido no Estatuto de autonomía de Galicia e segundo os termos sinalados pola Constitución española.
A Lei 5/2011, do 30 de setembro, de patrimonio da Comunidade Autónoma de Galicia, no seu artigo 82, permite a cesión de bens mobles da Comunidade Autónoma sempre que se dediquen a fins de utilidade pública ou interese social, e o cesionario queda obrigado a destinar os bens ao fin expresado no correspondente acordo.
O día 3 de decembro de 2012, a Asociación Cultural e Deportiva Penalba de Celeiro, presentou un escrito na Xefatura de Coordinación da Área do Mar con sede en Celeiro, en que solicitaba a cesión en propiedade dunha embarcación. Unha vez atopada unha embarcación que reunía as características solicitadas pola Asociación, comunicóuselle a posibilidade da súa cesión o 20 de marzo de 2013, ao cal respondeu afirmativamente o día 5 de abril de 2013, prestando a súa conformidade á cesión.
A referida asociación destinará a embarcación a fins de utilidade pública ou interese social e, de xeito especial, á realización de actividades de apoio nos adestramentos e competicións que organiza o Club de Remo de Celeiro, polo que cómpre cederlle en propiedade o ben moble antes indicado.
En consecuencia, de conformidade co previsto no artigo 27, números 15 e 29, do Estatuto de autonomía de Galicia, e en uso das facultades que me confire a Lei 5/2011, do 30 de setembro, de patrimonio da Comunidade Autónoma de Galicia, e a Lei 1/1983, do 22 de febreiro, de normas reguladoras da Xunta e da súa Presidencia,
DISPOÑO:
Artigo 1
Acórdase a cesión en propiedade á Asociación Cultural e Deportiva Penalba de Celeiro da embarcación seguinte:
Nome da embarcación: Santa María.
Ano de construción: 2006.
Modelo: Atlántico 4.0 Bote.
Casco: P.F.R.V.
Dimensións: eslora 3,98 metros, manga 1,70 metros e puntal 0,73 metros.
Total (R.B.): 1,28 TRB.
Matrícula: 3ª-CO-7-3086.
Ano de inscrición: 2006.
Artigo 2
O presente acordo de cesión leva implícita a desafectación do dominio público da embarcación que se cede en propiedade, citada no artigo 1.
Artigo 3
A cesión sinalada no artigo anterior queda sometida ás seguintes cláusulas:
a) De conformidade co establecido pola Lei 5/2011, do 30 de setembro, de patrimonio da Comunidade Autónoma de Galicia, no seu artigo 82, o ben cedido destinarao a asociación cesionaria a fins de utilidade pública ou interese social, de xeito especial á realización de actividades de apoio nos adestramentos e competicións que organiza o Club de Remo de Celeiro.
b) Coa cesión outórgaselle á Asociación Cultural e Deportiva Penalba de Celeiro a propiedade do ben moble cedido.
c) Serán por conta da entidade cesionaria a realización de todos os trámites de legalización da embarcación, incluído o seu cambio de titularidade e todos os gastos de conservación e mantemento do ben moble cedido.
d) Tanto se o ben cedido non se aplica aos fins sinalados, como se se descoida ou utiliza con grave quebrantamento, ou se incumpren as condicións do acordo, considerarase resolta a cesión e o ben reverterá á Comunidade Autónoma de Galicia, que terá dereito a percibir, logo da taxación pericial, o valor do detrimento ou deterioración que sufrise.
e) A asociación cesionaria realizará todos os trámites necesarios para o cambio de titularidade do ben cedido no rexistro marítimo da capitanía marítima correspondente, e serán pola súa conta todos os gastos que estes trámites orixinen.
Artigo 4
A cesión formalizarase mediante acta subscrita polo secretario xeral técnico desta consellería ou funcionario en quen delegue, e nela deberá constar o acordo de cesión e a aceptación do cesionario.
Artigo 5
Corresponde á consellería competente en materia de patrimonio verificar a aplicación da embarcación citada no artigo 1, co fin para o cal é cedida, e poderá adoptar para isto cantas medidas sexan necesarias.
Disposición derradeira primera
A Consellería do Medio Rural e do Mar, a través da Secretaría Xeral Técnica, realizará os trámites necesarios para a efectividade de canto se dispón nesta orde.
Disposición derradeira segunda
Esta orde producirá efectos desde o día seguinte ao da súa publicación no Diario Oficial de Galicia.
Santiago de Compostela, 28 de xuño de 2013
Rosa María Quintana Carballo
Conselleira do Medio Rural e do Mar