De conformidade co disposto no artigo 16 do Decreto 19/2012, do 11 de febreiro, polo que aproba o Regulamento de símbolos das entidades locais de Galicia (DOG nº 38, do 25 de febreiro de 2012) faise público que o Concello Pleno, en sesión celebrada o día 21 de marzo de 2013, adoptou por maioría de seis votos a favor e tres abstencións, que supoñen o quórum da maioría absoluta do número legal de membros que a compoñen, que é o de nove, o seguinte acordo:
1. Prestar aprobación ás propostas de escudo e bandeira da entidade local de Portomarín segundo os modelos achegados pola Comisión de Heráldica de Galicia, de acordo coas seguintes descricións:
A/ ESCUDO.
«BRASONAMENTO:
De goles (vermello) e sobre ondas de prata (branco) e azur (azul), unha ponte de ouro (amarelo) surmontado da cruz sanxoanista de prata. Ao timbre, coroa real pechada».
B/ BANDEIRA
DESCRICIÓN:
«De vermello á hasta, coa cruz branca de San Xoán, e terciada de amarelo con tres xiróns vermellos horizontais ao batente».
2. Someter o acordo plenario a información pública polo prazo dun mes, mediante anuncio no DOG e no taboleiro de anuncios.
3. Resolución polo Pleno, se é o caso, das alegacións que poidan formularse.
4. Remisión do expediente completo á Comisión de Heráldica, para o seu informe preceptivo e vinculante.
5. De obter o informe favorable, elevarase ao Consello da Xunta para aprobación».
O que se fai público para exame e reclamacións.
Portomarín, 18 de abril de 2013
Juan Carlos Serrano López
Alcalde