Logo de examinar o expediente instruído por instancia da empresa Gas Galicia SDG, S.A., con CIF nº A15383284 e enderezo, para os efectos de notificación, na rúa Lisboa, edificio Área Central, local 31-HIJ, 15707 Santiago de Compostela (A Coruña), resultan os seguintes

Antecedentes de feito.

Primeiro. O 26.3.2012 a empresa Gas Galicia SDG, S.A. presentou a solicitude de autorización administrativa e aprobación do proxecto de execución das instalacións da rede de distribución de gas natural no termo municipal do Pereiro de Aguiar (Ourense), acompañada do preceptivo proxecto. As características básicas das instalacións son as seguintes:

A subministración de gas natural realizarase desde unha conexión coa rede existente na rúa A Zamorana do Parque Empresarial de San Cibrao das Viñas, que se sitúa no límite dos termos municipais do Pereiro de Aguiar e San Cibrao das Viñas. Desde este punto de conexión, a rede continúa ata o polígono industrial do Pereiro de Aguiar en tubaxe de 200 mm de diámetro en dirección noroeste. Do ramal principal déixanse dúas derivacións, unha cara á zona da Medorra e outra cara á zona de Pedraio, ambas as dúas en tubaxe de 200 mm de diámetro. A rede entra polo polígono industrial, distribuíndose polas súas rúas e percorre a rúa principal en dirección norte ata chegar á urbanización Monterrei.

Esta rede de distribución, que aparece reflectida nos planos de planta de trazado incluídos no proxecto, deséñase para un rango de presión 2 < MOP (presión máxima de operación) ≤ 5 bar, en polietileno de alta densidade PE 100 SDR 17,6, de diámetro variable de 200, 110 e 90 mm, segundo necesidades. A lonxitude prevista para a rede proxectada é da orde dos 8.386 m.

O seu orzamento ascende á cantidade de trescentos oitenta e dous mil catorce euros con sesenta e catro céntimos (382.014,64 €).

Segundo. O 10.4.2012 a Dirección Xeral de Industria, Enerxía e Minas resolveu iniciar o trámite de competencia para o outorgamento da dita autorización administrativa, para os efectos previstos no artigo 5 do Decreto 62/2010, do 15 de abril. Esta resolución foi publicada no Diario Oficial de Galicia do 30 de abril de 2012 e durante o prazo establecido (30 días) non se presentaron outras solicitudes en concorrencia e, en consecuencia, continuouse co procedemento de outorgamento de autorización administrativa solicitada por Gas Galicia SDG, SA.

Terceiro. O 14.6.2012 a Dirección Xeral de Industria, Enerxía e Minas resolveu someter a información pública a solicitude de autorización administrativa e aprobación do proxecto de execución das instalacións da rede de distribución de gas natural no termo municipal do Pereiro de Aguiar (Ourense). Esta resolución publicouse no Diario Oficial de Galicia do 24 de agosto de 2012, no Boletín Oficial da provincia do 5 de setembro e nos xornais La Voz de Galicia e La Región do 27 de agosto, e tamén estivo exposta no taboleiro de anuncios do Concello do Pereiro de Aguiar durante un prazo de vinte días (do 23.6.2012 ao 10.7.2012).

Cuarto. Así mesmo, a Dirección Xeral de Industria, Enerxía e Minas trasladou as separatas deste proxecto ás distintas administracións, organismos ou empresas de servizo público ou de servizos de interese xeral, con bens e dereitos ao seu cargo, afectadas pola mencionada condución de gas, para os efectos de obter o seu informe ao respecto. Na seguinte táboa relaciónanse estas entidades e recóllese un resumo do seu informe:

Nº	Entidade	Resumo do informe
1	Dirección Xeral de Infraestruturas-Consellería de Medio Ambiente, Territorio e Infraestruturas	Non contestaron á petición de informe (xustificante de recepción do 19.6.2012), nin á reiteración desta petición (xustificante de recepción do 7.9.2012). Polo tanto, conforme o disposto nos artigos 80 e 84 do Real decreto 1434/2002, do 27 de decembro, enténdese a súa conformidade, sen prexuízo da autorización que lle corresponda outorgar.

Quinto. Durante o período en que o devandito proxecto se someteu ao trámite de información pública non se presentaron alegacións.

Sexto. O 22.10.2012 a Xefatura Territorial de Ourense da Consellería de Economía e Industria (en adiante, xefatura territorial) emitiu informe favorable sobre o devandito proxecto.

Fundamentos de dereito.

Primeiro. A Dirección Xeral de Industria, Enerxía e Minas é a competente para resolver este expediente con fundamento no Estatuto de autonomía de Galicia; no Real decreto 2563/1982, do 24 de xullo, sobre traspaso de funcións e servizos da Administración do Estado á Comunidade Autónoma de Galicia en materia de industria, enerxía e minas; no Decreto 132/1982, do 4 de novembro, sobre asunción de competencias en materia de industria, enerxía e minas e a súa asignación á Consellería de Industria, Enerxía e Comercio; no Decreto 13/2012, do 4 de xaneiro, polo que se fixa a estrutura orgánica das consellerías da Xunta de Galicia; e no Decreto 324/2009, do 11 de xuño, polo que se establece a estrutura orgánica da Consellería de Economía e Industria; en relación coa Lei 34/1998, do 7 de outubro, do sector de hidrocarburos; co Real decreto 1434/2002, do 27 de decembro, polo que se regulan as actividades de transporte, distribución, comercialización, subministración e procedementos de autorización de instalacións de gas natural; co Decreto 62/2010, do 15 de abril, polo que se regula o trámite de competencia e os criterios de valoración no suposto de concorrencia de dúas ou máis solicitudes de autorización administrativa de instalacións de transporte secundario e distribución de gas natural e redes de distribución de gases licuados do petróleo (GLP); coa Orde da Consellería de Industria e Comercio do 30 de novembro de 1999 sobre a tramitación de autorizacións administrativas das canalizacións de gas; e coa Lei 30/1992, do 26 de novembro, de réxime xurídico das administracións públicas e do procedemento administrativo común.

Segundo. O citado proxecto cumpre coas exixencias regulamentarias fixadas no Real decreto 919/2006, do 28 de xullo, polo que se aproba o Regulamento técnico de distribución e utilización de combustibles gasosos e as súas instrucións técnicas complementarias ICG 01 a 11.

Terceiro. En canto aos bens e dereitos afectados por esta infraestrutura gasista e adscritos ás distintas administracións, organismos ou empresas de servizo público ou de servizos de interese xeral, a empresa Gas Galicia SDG, S.A. procederá a realizar os correspondentes cruzamentos e afeccións de acordo cos condicionados e informes emitidos por estes ou, de ser o caso, pendentes de emitir.

Cuarto. No expediente instruído para o efecto cumpríronse os trámites regulamentarios.

De conformidade cos preceptos legais citados e cos demais de pertinente e xeral aplicación, esta dirección xeral

RESOLVE:

Outorgar a empresa Gas Galicia SDG, S.A. a autorización administrativa e aprobar o proxecto de execución das instalacións da rede de distribución de gas natural no termo municipal do Pereiro de Aguiar (Ourense), con suxeición ás seguintes condicións:

Primeira. Gas Galicia SDG, S.A. constituirá no prazo de dous meses, contado desde o momento do outorgamento da autorización, unha fianza por valor de 7.640,29 €, importe do 2 % do orzamento das instalacións, para garantir o cumprimento das súas obrigas, conforme o previsto no artigo 73.4 da Lei 34/1998, do 7 de outubro, e no artigo 82 do Real decreto 1434/2002, do 27 de decembro. Esta fianza constituirase na Caixa Xeral de Depósitos da Consellería de Facenda da Xunta de Galicia, en calquera das formas sinaladas no artigo 11.3 do Decreto 1775/1967, do 22 de xullo, sobre o réxime de instalación, ampliación e traslado de industrias, e será devolta unha vez se formalice a acta de posta en marcha das instalacións.

Segunda. As instalacións e as súas montaxes deberán cumprir as disposicións e normas técnicas que en xeral sexan de aplicación e, en particular, as correspondentes ao Real decreto 1434/2002, do 27 de decembro, ao Regulamento técnico de distribución e utilización de combustibles gasosos coas súas instrucións técnicas complementarias e as normas que os cumprimentan, regulamentos electrotécnicos, normas UNE e demais normativa e directrices vixentes, así como cantas as substitúan ou se diten a nivel estatal ou desta comunidade autónoma, e deberán preverse para responder aos avances tecnolóxicos no eido do gas e lograr abastecementos flexibles e seguros.

Terceira. O prazo para a posta en marcha das instalacións que se autorizan será de doce meses, contados a partir da data da última autorización administrativa necesaria para a súa execución.

Cuarta. A autorización administrativa afecta o termo municipal do Pereiro de Aguiar, na provincia de Ourense, e contempla a gasificación deste municipio de acordo coas especificación e planos que figuran no proxecto presentado por Gas Galicia SDG, S.A., con referencia 13760 C.D.6.5.03 e data de marzo de 2012, e subscrito polo enxeñeiro industrial Alfonso Vázquez Varela (colexiado nº 1.130 do Colexio Oficial de Enxeñeiros Industriais de Galicia).

Quinta. Unha vez construídas as instalacións autorizadas, Gas Galicia SDG, S.A. deberá presentar a solicitude de posta en marcha ante a xefatura territorial, quen deberá estendela, previas as comprobacións técnicas que considere oportunas. Previamente ao levantamento da acta de posta en marcha, a xefatura territorial solicitará á empresa distribuidora os ensaios e probas oportunas, así como o certificado de dirección e remate de obra, asinado por técnico competente, no que conste que a construción e montaxe das instalacións se efectuaron de acordo co proxecto correspondente, acreditando, así mesmo, expresamente, o cumprimento das condicións técnicas e prescricións regulamentarias de aplicación.

Sexta. Gas Galicia SDG, S.A. deberá iniciar a subministración de gas no prazo dun mes contado a partir da data na que a xefatura territorial formalice a acta de posta en marcha.

Sétima. Esta autorización outórgase sen prexuízo de terceiros e independentemente das autorizacións ou licenzas de competencia doutros organismos ou entidades públicas, necesarios para realizar as instalacións aprobadas.

Oitava. A Administración resérvase o dereito a deixar sen efecto esta autorización por calquera das causas sinaladas no artigo 34.1 do Decreto 1775/1967, do 22 de xullo; por incumprimento das condicións estipuladas; pola facilitación de datos inexactos; ou por calquera outra causa legal ou regulamentaria que así o prevexa.

Contra esta resolución, que non pon fin á vía administrativa, poderá interpoñerse, de ser o caso, recurso de alzada ante o conselleiro de Economía e Industria, no prazo dun mes contado a partir do día seguinte ao da súa notificación.

Santiago de Compostela, 5 de febreiro de 2013

Ángel Bernardo Tahoces
Director xeral de Industria, Enerxía e Minas