O Pleno da corporación na sesión ordinaria que tivo lugar o día 31 de xaneiro de 2013, adoptou entre outros o seguinte acordo:
a) Rexeitar a alegación presentada no período de información pública a que se someteu o acordo de aprobación inicial da modificación, por José García Cumplido, en representación da comunidade de propietarios do portal núm. 5-7 da rúa de Ramón Cabanillas, con base na fundamentación contida no informe da arquitecta municipal transcrito máis arriba.
b) Aprobar definitivamente a modificación puntual do Plan especial de protección do patrimonio construído no ámbito das vivendas de Ramírez, segundo o proxecto formulado polos servizos técnicos municipais da área de Urbanismo, sen modificacións respecto do aprobado inicialmente e sometido a información pública.
O acordo notificarase persoalmente a todos os interesados e publicarase no Diario Oficial de Galicia e no Boletín Oficial da provincia, no que se inserirá así mesmo a normativa urbanística aprobada.
Igualmente se remitirá á Consellería de Medio Ambiente, Territorio e Infraestruturas comunicación do acordo de aprobación definitiva, xunto con dous exemplares dilixenciados do documento definitivamente aprobado.
O acordo de aprobación definitiva da citada modificación puntual do Plan especial foi comunicado á Consellería de Medio Ambiente, Territorio e Infraestruturas con data do 20 de febreiro de 2013, en cumprimento do disposto polo artigo 92.3 da Lei 9/2002, do 30 de decembro, de ordenación urbanística e protección do medio rural de Galicia (LOUG).
O anuncio de aprobación definitiva, xunto coa normativa, publicouse no Boletín Oficial da provincia da Coruña número 47, do 8 de marzo de 2013.
Contra o acordo de aprobación definitiva poderase interpoñer directamente recurso contencioso-administrativo ante o Tribunal Superior de Xustiza de Galicia no prazo de dous meses, contado a partir do día seguinte ao da publicación deste anuncio.
Santiago de Compostela, 8 de marzo de 2013
María Pardo Valdés
Concelleira da Área de Desenvolvemento Urbano e Sostible
