O Decreto 242/2008, do 9 de outubro, polo que se regulan a natureza, os fins e os órganos de goberno das escolas universitarias de enfermaría dependentes da Consellería de Sanidade, atribúelle no seu artigo 6.a) a Presidencia do Padroado destas escolas á conselleira de Sanidade, ou persoa en quen delegue.

Así, mediante a Orde do 14 de xaneiro de 2009, fíxose efectiva aquela posibilidade de delegación, atribuíndollela aos entón delegados provinciais da Consellería de Sanidade (actuais xefes/as territoriais).

Posteriormente, por Orde do 3 de setembro de 2009, delegouse nos titulares das xerencias dos complexos hospitalarios da Coruña e Ourense a Presidencia dos padroados das escolas universitarias de enfermaría dependentes da Consellería de Sanidade na Coruña e Ourense, respectivamente.

Tendo en conta as delegacións xa realizadas e os criterios organizativos consecuencia das estruturas orgánicas da Consellería de Sanidade e do Servizo Galego de Saúde, aprobadas polos decretos 310 e 311/2009, respectivamente, cómpre adaptar as delegacións ás necesidades organizativas e operativas actuais, en relación ao correcto exercicio das funcións atribuídas polo Decreto 242/2008, do 9 de outubro, antes citado.

Na súa virtude, no uso das facultades que me confire o artigo 38 da Lei 1/1983, do 22 de febreiro, reguladora da Xunta e da súa Presidencia, modificada pola Lei 11/1988, do 20 de outubro; e de conformidade co disposto no artigo 13 da Lei 30/1992, do 26 de novembro, de réxime xurídico das administracións públicas e do procedemento administrativo común, e no artigo 6 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, así como no artigo 6 do Decreto 242/2008, do 9 de outubro, polo que se regulan a natureza, os fins e os órganos de goberno das escolas universitarias de enfermaría dependentes da Consellería de Sanidade,

DISPOÑO:

Artigo único

Delegar na persoa titular da Xerencia do Complexo Hospitalario Universitario de Vigo a Presidencia do Padroado da Escola Universitaria de Enfermaría do Meixoeiro de Vigo, dependente da Consellería de Sanidade.

Disposición derrogatoria

Queda derrogada calquera outra disposición de igual ou inferior rango que se opoña ao establecido nesta orde.

Disposición derradeira

Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 18 de febreiro de 2013

Rocío Mosquera Álvarez
Conselleira de Sanidade