O Concello Pleno, en sesión extraordinaria do 25 de xaneiro de 2013, acordou co quórum da maioría absoluta do número legal dos seus membros:
Primeiro. Aprobar inicialmente o Plan xeral de ordenación municipal do Concello de Caldas de Reis que redactou a empresa PETTRA, e que clasifica o solo e define os elementos fundamentais da estrutura xeral do territorio deste municipio.
Segundo. Que o plan aprobado inicialmente con todos os documentos integrantes do expediente tramitado, incluído o informe de sustentabilidade ambiental, sexa sometido:
1. Ás consultas previstas no documento de referencia.
2. Ao trámite de información pública polo prazo de dous meses, contados desde o día seguinte ao de publicación do presente anuncio no Diario Oficial de Galicia. Durante o dito período quedará o expediente, con todos os documentos que integran o plan xeral, incluído o informe de sustentabilidade ambiental, á disposición de calquera que queira examinalo para que presente as alegacións que considere convenientes. Ademais, o correspondente anuncio publicarase en dous dos xornais de maior difusión na provincia de Pontevedra.
3. Ao trámite de audiencia aos concellos limítrofes, durante o mesmo prazo.
Terceiro. Solicitar das administracións públicas competentes, ao mesmo tempo que o trámite de información pública, os informes sectoriais que resulten necesarios e que deberán ser emitidos no prazo máximo dun mes, agás que a lexislación sectorial sinale outro prazo.
Cuarto. Enviar ao órgano ambiental a documentación completa do plan, unha vez transcorrido o período de consultas e información pública e con carácter previo á aprobación provisional.
Quinto. De conformidade co sinalado no artigo 77 da LOUGA, o acordo de aprobación inicial do PXOM determina, por si só, a suspensión do procedemento de outorgamento de licenzas naqueles ámbitos do territorio obxecto de implantación no caso en que as novas determinacións deste supoñan a modificación da ordenación urbanística vixente; para estes efectos, determinará expresamente as áreas afectadas pola suspensión. Esta suspensión terá unha duración máxima de dous anos, contando desde a devandita aprobación e, en calquera caso, extinguirase coa aprobación definitiva da implantación.
As zonas concretas en que se deben suspender as licenzas para que non interfiran coa redacción do PXOM que se está a tramitar son as seguintes:
a) Nas zonas afectadas por sistemas xerais ou locais de vías, infraestruturas, equipamentos ou espazos libres (de entre as establecidas en calquera dos dous documentos: NSM de 1995 vixentes ou PXOM aprobado inicialmente), en calquera clase de solo. Non se entenderán suspendidos os procedementos de calquera clase (obras, proxectos, plans ou as súas modificacións) en zonas con esta cualificación (vías, infraestruturas, equipamentos ou espazos libres), sempre que tales procedementos teñan por obxecto a materialización de sistemas infraestruturais ou dotacionais deste tipo, aínda que na implantación vixente ou en trámite estea cualificado de xeito diferente ao que se pretende materializar (neste caso deberase tramitar o procedemento que corresponda para validar ese cambio).
b) No solo urbano consolidado e nos núcleos rurais (de entre os establecidos en calquera dos dous documentos) suspenderanse naquelas zonas en que non se poidan cumprir ambas as ordenacións ou normativas simultaneamente (NSM de 1995 vixentes e PXOM) e, en todo caso, naquelas zonas afectadas polas vías, infraestruturas e equipamentos ou espazos libres. A respecto dos parámetros concretos de ordenación que establezan ambos os documentos en cada zona, os proxectos sometidos a licenza non poderán superar o valor máis baixo (de entre os dous documentos) no caso de alturas, fondos, volume, edificabilidade (entre outros parámetros de aproveitamento) e, por outra banda, no caso doutros parámetros que se regulan en sentido inverso aos anteriormente citados (cesións, espazos libres, espazos comunitarios ou públicos etc.) non poderán ser inferiores ao valor máis alto (de entre os establecidos nos dous documentos).
c) No solo urbano non consolidado do PXOM suspenderanse nos ámbitos en que as determinacións da implantación vixente resulten incompatibles coas do PXOM aprobado inicialmente.
d) No solo urbanizable (delimitado e non delimitado) de calquera dos dous documentos (NSM vixentes e PXOM) suspenderanse nos ámbitos en que as determinacións da implantación vixente resulten incompatibles coas do PXOM aprobado inicialmente.
e) No solo rústico, no caso das licenzas en que se require da autorización previa da CMATI (entre outras administracións que deban autorizar en cada caso), e estimando que esas propias administracións van regular axeitadamente as autorizacións que se poidan conceder transitoriamente mentres non se aproba definitivamente o PXOM, só se suspenderán as licenzas no caso xeral do punto a) anterior (zonas afectadas por sistemas xerais ou locais de vías, infraestruturas, equipamentos ou espazos libres, aplicando, se é o caso, as excepcións establecidas nese punto), e para efectuar ese control, os servizos técnicos municipais comprobarán, antes de solicitar a autorización previa da CMATI, que a solicitude de licenza non se atopa afectada por esta circunstancia.
f) No solo rústico, no caso das licenzas en que non se require da autorización previa da CMATI e, polo tanto, as poida conceder directamente o concello, as licenzas suspenderanse só naquelas zonas en que non se poidan cumprir ambas as ordenacións ou normativas simultaneamente (NSM de 1995 vixentes e PXOM) e, sobre todo, naquelas zonas afectadas polas vías, infraestruturas, equipamentos ou espazos libres (aplicando, se é o caso, as excepcións establecidas no punto a) anterior). A respecto dos parámetros concretos de ordenación que establezan ambos os documentos en cada zona, aplicaranse, se é o caso, os máis restritivos, segundo se ten definido no punto b) anterior.
g) Consideraranse tamén suspendidas as licenzas de demolición ou edificación en todos os elementos do catálogo previstos no presente PXOM. Unicamente se permitirán as obras de conservación e mantemento.
h) Ao respecto da tramitación de plans de desenvolvemento, nos ámbitos de implantación remitidos a eles, tanto en solo urbano non consolidado como en solo urbanizable, poderase iniciar ou continuar a tramitación dos xa iniciados (no momento de entrada en vigor da presente suspensión de licenzas), sempre e cando as determinacións da implantación de desenvolvemento resulten compatibles coas determinacións da implantación vixente e do PXOM aprobado inicialmente. No caso de ámbitos da implantación que tramiten administracións supramunicipais, non se verán afectados pola presente suspensión de licenzas.
Os actos xenéricos para os que se suspende o outorgamento de licenzas (cando non se especifican exactamente) son os de parcelamento de terreos, edificación e demolición. Nos casos do grupo b) ou f) anteriores en que se poida acadar unha solicitude cun acordo volumétrico intermedio entre os plans de aplicación coordenada (NSM vixentes e PXOM), serán os servizos técnicos municipais os que determinen a congruencia das solicitudes e a súa integración na ordenación urbanística final, sen superar o valor máis desfavorable para cada parámetro volumétrico de entre os que os citados plans outorguen, e prevalecendo sempre a ordenación máis restritiva (menor altura, fondos ou volume e maiores cesións, espazos públicos etc.) ou a maior protección das establecidas en ambos os documentos.
Caldas de Reis, 28 de xaneiro de 2013
Juan Manuel Rey Rey
Alcalde presidente
