Con data do 30 de abril de 2008 concedéuselle á Sociedade Galega do Medio Ambiente, S.A. (Sogama) a autorización ambiental integrada nº 2006/0327_AIA/IPPC_163 para as instalacións do vertedoiro de residuos urbanos de Areosa e do Complexo Ambiental de Cerceda, no concello de Cerceda (A Coruña). A anterior autorización modificouse substancialmente o 21 de xullo de 2012, manténdose o prazo da vixencia ata o 19 de maio de 2013.
O artigo 25 da Lei 16/2002, do 1 de xullo, de prevención e control integrados da contaminación, estipula que, transcorrido o prazo de vixencia da autorización, esta debe ser renovada e, se é o caso, actualizada. Atendendo ao indicado, e para os efectos previstos no artigo 7.2 do Real decreto 509/2007, do 20 de abril, polo que se aproba o Regulamento para o desenvolvemento e execución da Lei 16/2002, faise público que por espazo de trinta (30) días hábiles, contados a partir do seguinte ao da publicación deste anuncio no Diario Oficial de Galicia, quedará exposta a documentación presentada pola solicitante para a renovación da autorización ambiental integrada, constituída polo documento titulado:
– Solicitude de renovación da autorización ambiental integrada. Sogama, Sociedade Galega do Medio Ambiente (novembro 2012 N.E. 17397).
– Documento de síntese: solicitude de renovación da autorización ambiental integrada. Sogama, Sociedade Galega do Medio Ambiente (novembro 2012 N.E. 17397).
Co fin de que calquera interesado poida consultalo e, se é o caso, formular no dito prazo as alegacións, suxestións ou observacións que considere convenientes. O dito documento estará á disposición dos administrados, en horario de atención ao público, nas seguintes dependencias:
– Secretaría Xeral de Calidade e Avaliación Ambiental, Servizo de Prevención e Control Integrados da Contaminación (San Lázaro, s/n, 15781 Santiago de Compostela).
– Xefatura Territorial da Coruña da Consellería de Medio Ambiente, Territorio e Infraestruturas (r/ Vicente Ferrer, 2, 15008 A Coruña).
– Concello de Cerceda (avda. do Mesón, nº 21, 15185 Cerceda, A Coruña).
Santiago de Compostela, 16 de xaneiro de 2013
Justo de Benito Basanta
Secretario xeral de Calidade e Avaliación Ambiental