Por Resolución reitoral do 26 de xullo de 2012 (DOG do 9 de agosto e BOE do 3 de setembro) convocáronse probas selectivas para cubrir sete prazas da categoría profesional de técnico superior de xestión do grupo I, catro pola quenda de promoción interna e tres pola quenda de acceso libre.
Por Resolución reitoral do 16 de outubro de 2012 (DOG do 2 de novembro) aprobouse a relación provisional de persoas aspirantes admitidas e excluídas nas mencionadas probas selectivas, e fixouse un prazo para emendar os defectos que motivasen a exclusión.
Rematado o dito prazo e consonte o establecido na base 4.4 da convocatoria, o reitor
RESOLVE:
Primeiro. Declarar aprobadas e facer públicas as listaxes definitivas de persoas admitidas e excluídas polas quendas de promoción interna e de acceso libre ás citadas probas.
Segundo. Indicar que as listaxes definitivas de persoas aspirantes admitidas e excluídas están exposta nos taboleiros de anuncios da Reitoría, da Casa da Balconada, do edificio de Servizos Administrativos e Biblioteca Intercentros e na web http://www1.usc.es/webpas/
Terceiro. Convocar as persoas aspirantes admitidas pola quenda de promoción interna para a realización do primeiro exercicio da fase de oposición (probas de lingua galega) o día 5 de febreiro de 2013, ás 10.00 horas, na sala Acces Grid do Edificio Cactus, Campus Vida, Santiago de Compostela.
A publicación dos sucesivos anuncios de realización dos demais exercicios será efectuada polo tribunal nos locais onde teña lugar o primeiro deles, na Reitoría da universidade e na páxina web http://www.usc.es/gl/goberno/xerencia/selecciondepersoal.html
As persoas aspirantes admitidas pola quenda de acceso libre serán convocadas para a realización do primeiro exercicio da fase de oposición (probas de lingua galega) mediante resolución reitoral, na cal se indicará o día, a hora e o lugar e que se publicará no DOG.
Cuarto. As persoas aspirantes deberán presentarse para a realización de cada exercicio co DNI ou documento fidedigno acreditativo da súa identidade, a xuízo do tribunal. Así mesmo, deberán presentarse provistos do correspondente lapis do número 2 e goma de borrar para a realización dos exercicios tipo test.
Contra a presente resolución, que esgota a vía administrativa, poderase interpor un recurso contencioso-administrativo ante o Xulgado do Contencioso-Administrativo de Santiago de Compostela, no prazo de dous meses contados desde o día seguinte ao da súa publicación, de conformidade co disposto na Lei 29/1998, do 13 de xullo, reguladora da xurisdición contencioso-administrativa.
Non obstante, as persoas interesadas poderán interpor un recurso potestativo de reposición no prazo dun mes perante o órgano que a ditou. Neste caso non se poderá interpor o recurso contencioso-administrativo antedito mentres non se dite resolución expresa ou presunta do recurso administrativo de reposición, ao abeiro dos artigos 116 e seguintes da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro.
Santiago de Compostela, 21 de decembro de 2012
Juan José Casares Long
Reitor da Universidade de Santiago de Compostela