O Concello de Dumbría solicita a aprobación definitiva do expediente referido, tramitado ao abeiro da disposición adicional 2ª.2 da Lei 9/2002, de ordenación urbanística e protección do medio rural de Galicia.
I. Antecedentes.
1. O Concello de Dumbría carece actualmente de planeamento xeral de ámbito municipal, polo que resultan aplicables as Normas complementarias e subsidiarias de planeamento da provincia da Coruña aprobadas definitivamente pola Orde da Consellería de Ordenación do Territorio e Obras Públicas do 3.4.1991.
2. O Pleno do concello aprobou inicialmente o expediente de delimitación do solo de núcleo rural das Touzas con data do 30.4.2009. Sometido a información pública polo prazo dun mes (Diario Oficial de Galicia nº 90, do 11 de maio e xornais El Correo Gallego do 8 de maio e La Voz de Galicia do 10 de maio de 2009) non foi presentada ningunha alegación, conforme o certificado do secretario municipal incluído para o efecto no expediente.
3. Consta informe do secretario-interventor municipal con data do 28.4.2009.
4. O Pleno do concello aprobou provisionalmente o proxecto con data do 4.9.2009.
5. A Secretaría Xeral de Ordenación do Territorio e Urbanismo resolveu non outorgar a aprobación definitiva á delimitación do solo do núcleo rural das Touzas o 9.12.2009, ao se detectar nesta diversas deficiencias.
6. Augas de Galicia emitiu un informe favorable o 1.8.2010.
7. A técnica municipal emitiu informe sobre documento o 14.2.2012.
8. O Pleno do concello aprobou provisionalmente o proxecto corrixido o día 7.9.2012.
II. Análise e consideracións.
Analizada a documentación remitida polo concello, en relación coas consideracións da Resolución da Secretaría Xeral de Ordenación do Territorio e Urbanismo do 9.12.2009; e vista a proposta subscrita pola Subdirección Xeral de Urbanismo, púidose comprobar que o proxecto agora presentado emenda as deficiencias sinaladas nesa resolución.
III. Resolución.
Visto canto antecede,
RESOLVO:
Aprobar definitivamente o proxecto de delimitación do solo de núcleo rural histórico-tradicional das Touzas, no Concello de Dumbría (A Coruña).
Contra esta resolución, que non pon fin á vía administrativa, poderase interpoñer recurso de alzada ante o conselleiro de Medio Ambiente, Territorio e Infraestruturas, no prazo dun mes que se contará a partir do día seguinte ao de notificación desta resolución, sen prexuízo de que os interesados poidan exercer, se é o caso, calquera outro que consideren procedente (artigos 48, 58, 114 e 115 da Lei 30/1992, do 26 de novembro, de réxime xurídico das administracións públicas e do procedemento administrativo común, modificado pola Lei 4/1999, do 13 de xaneiro).
No suposto de que o interesado sexa unha administración pública non caberá interpoñer recurso en vía administrativa. Poderase interpoñer recurso contencioso-administrativo perante a Sala do Contencioso-Administrativo do Tribunal Superior de Xustiza de Galicia, no prazo de dous meses contados desde o día seguinte ao da notificación, sen prexuízo da formulación, se é o caso, do requirimento previo en igual prazo (artigos 44 e 46 da Lei 29/1998, do 13 de xullo, da xurisdición contencioso-administrativa).
Notifíquese ao concello e publíquese no Diario Oficial de Galicia.
Santiago de Compostela, 14 de novembro de 2012
María Encarnación Rivas Díaz
Secretaria xeral de Ordenación do Territorio e Urbanismo