Vista a proposta emitida con data 18.12.2012 pola xefa da Área de Explotación e Planificación, coa conformidade da dirección deste ente público, de apertura dun proceso de convocatoria pública para a presentación de solicitudes de autorizacións de atracada para embarcacións deportivas nas instalacións náutico-deportivas no porto da Pobra do Caramiñal, esta presidencia, baseándose no disposto nos artigos 6.3.g) da Lei 5/1994, do 29 de novembro, de creación do ente público Portos de Galicia, e 9.h) do Decreto 227/1995, do 20 de xullo, polo que se aproba o regulamento do dito ente, e en virtude das atribucións delegadas pola conselleira do Medio Rural e do Mar, conferidas pola Orde do 30 de marzo de 2012,
RESOLVO:
Autorizar a apertura dunha nova convocatoria pública de solicitudes de autorizacións de atracada nas instalacións para embarcacións deportivas no porto da Pobra do Caramiñal. O período de presentacións de solicitudes comezará a partir das 9.00 horas do quinto (5) día hábil seguinte ao da publicación do anuncio no Diario Oficial de Galicia, por un prazo indeterminado e ata que Portos de Galicia decida pechalo por razóns de interese portuario.
Aprobar o prego de bases que rexerá esta convocatoria e os pregos de condicións das autorizacións que se asignen. Estes pregos estarán á disposición dos interesados na sede central do ente público Portos de Galicia, sita na praza de Europa, 5-A, 6º, 15707 Santiago de Compostela, e na páxina web de Portos de Galicia www.portosdegalicia.com
As autorizacións de atracada outorgaranse a aquelas solicitudes que cumpran coas prescricións establecidas no prego de bases da convocatoria, considerando a prioridade temporal na presentación. Para os efectos que quedan sinalados, nas solicitudes figurará a data e hora da súa presentación. Se por calquera causa o organismo correspondente non acredita a hora na solicitude, computarase como hora de entrada no rexistro as 14.00 horas.
Ábrese, así mesmo, un prazo de vinte (20) días hábiles, contados a partir do seguinte ao da publicación deste anuncio no Diario Oficial de Galicia, para que as persoas e entidades interesadas poidan presentar por escrito, na sede central de Portos de Galicia, as alegacións que consideren oportunas relativas a esta convocatoria.
Santiago de Compostela, 18 de decembro de 2012
José Juan Durán Hermida
Presidente de Portos de Galicia