Con data do 26 de setembro de 2012, publicouse no Diario Oficial de Galicia Resolución do 14 de agosto de 2012, da Dirección Xeral de Industria, Enerxía e Minas, pola que se someteu a información pública o proxecto de abandono definitivo de labores e o plan de restauración dunha parte da canteira Vilafría III nº 1544.6, sita no concello do Porriño (Pontevedra), promovido pola entidade Graniblok, S.A.

Na referida publicación indicouse que o plan de restauración se atopaba dispoñible ao público, para a súa consulta, na Sección de Minas da Xefatura Territorial da Consellería de Economía e Industria en Pontevedra, nas oficinas da Dirección Xeral de Industria, Enerxía e Minas e no portal da Consellería de Economía e Industria
(http://economiaeindustria.xunta.es/expediente-explotacions-mineiras).

A información estivo accesible ao público tanto na Sección de Minas da Xefatura Territorial da Consellería de Economía e Industria en Pontevedra como nas oficinas da Dirección Xeral de Industria, Enerxía e Minas, e non apareceu publicado no portal web referido durante o prazo sinalado.

Realizada a información pública prevista no artigo 6 do Real decreto 975/2009, do 12 de xuño, sobre xestión dos residuos das industrias extractivas e de protección e rehabilitación do espazo afectado por actividades mineiras, e co obxecto de cumprir o previsto en materia de difusión da información ambiental por medio das tecnoloxías de información e das telecomunicacións, da Lei 27/2006, do 18 de xullo, pola que se regulan os dereitos de acceso á información, de participación pública e de acceso á xustiza en materia de ambiente, de acordo co establecido no artigo 84 da Lei 30/1992, do 26 de novembro, de réxime xurídico das administracións públicas e do procedemento administrativo común, habilítase un prazo adicional de dez (10) días hábiles para a súa consulta. As posibles alegacións presentaranse durante o prazo sinalado, dirixidas ao director xeral de Industria, Enerxía e Minas, en calquera das oficinas previstas no artigo 38.4 da Lei 30/1992, do 26 de novembro, de réxime xurídico das administracións públicas e do procedemento administrativo común.

Santiago de Compostela, 21 de novembro de 2012

Ángel Bernado Tahoces
Director xeral de Industria, Enerxía e Minas