Mediante esta resolución, en cumprimento do artigo 15.1 da Lei 10/1995, do 23 de novembro, de ordenación do territorio de Galicia, faise público que o Consello da Xunta de Galicia, na súa reunión do día 4 de outubro de 2012, adoptou o seguinte
ACORDO:
Iniciar o procedemento da elaboración do Plan territorial integrado da bacía hidrográfica do río Eume, de conformidade co disposto no artigo 12.1 da Lei 10/1995, do 23 de novembro, de ordenación do territorio de Galicia, en desenvolvemento e cumprimento da determinación 10.1.2. das directrices de ordenación do territorio de Galicia.
O Plan territorial integrado terá como ámbito o da bacía hidrográfica do río Eume e permitirá establecer unha análise exhaustiva e transversal coordinada e integral das diferentes políticas da Xunta de Galicia, arredor do elemento de dimensión do novo lago das Pontes.
O obxectivo deste plan territorial integrado será o desenvolvemento dun territorio ordenado e eficiente, contribuíndo a unha planificación racional dos usos do solo, tendo en conta a referente hidrolóxica, fío condutor do plan, desde a perspectiva da avaliación preventiva de danos e a xestión dos problemas hidrolóxicos.
Segundo a determinación 8.1. das DOT e conforme os criterios da Lei 7/2008, do 7 de xuño, de protección da paisaxe de Galicia, este PTI considerará a perspectiva global e integral da paisaxe e seguirá as definicións e criterios xerais recollidos na parte correspondente da memoria das directrices de ordenación do territorio.
O contido do PTI axustarase ao establecido no artigo 13 da Lei 10/1995, do 23 de novembro, de ordenación do territorio de Galicia. Asemade, considerando que abrangue a conca hidrográfica do río Eume, o PTI deberá ter en conta tres aspectos:
– Integrará a planificación e o estudo das zonas inundables.
– Contribuirá a facilitar a redacción do Plan hidrolóxico da bacía do Eume, conforme a Orde ARM/2656/2008, do 10 de setembro, pola que se aproba a instrución de planificación hidrolóxica modificada pola Orde ARM/1195/2011, do 11 de maio.
– Realizarase un estudo en especial da incidencia do lago na zonificación e usos do solo.
Este Plan territorial integrado da bacía hidrográfica do río Eume será formulado e impulsado pola Consellería de Medio Ambiente, Territorio e Infraestruturas, coa dirección conxunta do Instituto de Estudos do Territorio e de Augas de Galicia como organismo de bacía, coa participación da Secretaría Xeral de Ordenación do Territorio e Urbanismo, a Secretaría Xeral de Calidade e Avaliación Ambiental e a Dirección Xeral de Conservación da Natureza, e coa colaboración das consellerías do Medio Rural e do Mar, e de Cultura, Educación e Ordenación Universitaria.
Este acordo de inicio será publicado no Diario Oficial de Galicia e, polo menos, en dous xornais dos de maior circulación na comunidade autónoma, e notificarase ás deputacións provinciais da Coruña e Lugo e aos concellos dentro do ámbito do PTI:
– Na provincia da Coruña: Pontedeume, Cabanas, Vilarmaior, A Capela, Monfero, Irixoa, Aranga, As Somozas, As Pontes de García Rodríguez.
– Na provincia de Lugo: Guitiriz, Xermade, Muras, Vilalba, Abadín.
Santiago de Compostela, 10 de outubro de 2012
Manuel Borobio Sanchiz
Director do Instituto de Estudos do Territorio