A Orde da Consellería do Medio Rural do 23 de decembro de 2011 (DOG nº 248, do 29 de decembro) establece as bases reguladoras para a concesión das axudas para a execución de medidas de promoción do sector vitivinícola en mercados de países terceiros, e a convocatoria para o ano 2012.

No seu artigo 21 indícase que o financiamento das axudas previstas nesta orde para o ano 2012, procedente do Fondo Europeo Agrícola de Garantía (Feaga), é de 950.000 euros con cargo á aplicación orzamentaria 13.04.713D.770.0 dos orzamentos xerais da Comunidade Autónoma de Galicia. Esta dotación poderá verse incrementada con fondos transferidos do Ministerio de Medio Ambiente, Medio Rural e Mariño, de acordo co previsto no Real decreto 244/2009, do 27 de febreiro, modificado polo Real decreto 461/2011 e con outros remanentes orzamentarios, sen prexuízo de posteriores variacións producidas como consecuencia de modificacións orzamentarias.

Unha vez asignados fondos na conferencia sectorial de Agricultura e Desenvolvemento Rural do 9 de xullo, de acordo co previsto no Real decreto 244/2009, do 27 de febreiro, para a aplicación das medidas do programa de apoio ao sector vitivinícola español (BOE nº 28, do 2 de febreiro), considérase oportuno ampliar o importe da dotación orzamentaria consignada inicialmente para a concesión das mencionadas axudas.

En consecuencia, de acordo co disposto no artigo 30.I.3 do Estatuto de autonomía de Galicia, e no uso das facultades que me confire a Lei 9/2007, do 13 de xuño, de subvencións de Galicia,

DISPOÑO:

Artigo único. Obxecto

Ampliar a dotación orzamentaria que se establece no artigo 21 da Orde do 23 de decembro de 2011 (DOG nº 248, do 29 de decembro) pola que se establecen as bases reguladoras para a concesión das axudas para a execución de medidas de promoción do sector vitivinícola en mercados de países terceiros, e a convocatoria para o ano 2012.

O incremento da dotación para o exercicio orzamentario 2012 será de 542.747,54 euros con cargo á aplicación orzamentaria 16.20.713D.770.0.

En todo caso, a concesión das axudas reguladas na mencionada orde estará limitada ás dispoñibilidades orzamentarias.

Contra esta orde, que pon fin á vía administrativa, poderase interpor recurso potestativo de reposición ante a conselleira do Medio Rural e do Mar, no prazo dun mes, contado a partir do día seguinte ao da súa publicación no Diario Oficial de Galicia, de conformidade co establecido na Lei 30/1992, do 26 de novembro, de réxime xurídico das administracións públicas e do procedemento administrativo común, ou directamente recurso contencioso-administrativo perante a Sala do Contencioso-Administrativo do Tribunal Superior de Xustiza de Galicia, no prazo de dous meses que se contará desde a mesma data, consonte o disposto no artigo 46 da Lei 29/1998, do 13 de xullo, reguladora da xurisdición contencioso-administrativa, sen prexuízo de que os interesados poidan exercitar calquera outro que estimen pertinente.

Disposición adicional única

A ampliación de crédito prevista no artigo único desta orde non afecta o prazo de presentación de solicitudes establecido no artigo 19 da mencionada Orde do 23 de decembro de 2011.

Santiago de Compostela, 11 de outubro de 2012

Rosa María Quintana Carballo
Conselleira do Medio Rural e do Mar