O Consello da Xunta de Galicia acordou, na súa reunión de data 20 de setembro de 2012, declarar o proxecto sectorial de actividades extractivas da concesión de explotación Santa Lucía número 4875.1, no concello de Castrelo de Miño, promovido pola empresa Sancus Granitos y Energías, S.L., como de incidencia supramunicipal, para os efectos previstos na Lei 10/1995, de ordenación do territorio de Galicia.
O artigo 13.2 do Decreto 80/2000, do 23 de marzo, polo que se regulan os plans e proxectos sectoriais de incidencia supramunicipal, establece que os plans ou proxectos que o Consello da Xunta de Galicia declare como de incidencia supramunicipal se someterán por un prazo mínimo dun mes aos trámites de información pública, mediante o correspondente anuncio no Diario Oficial de Galicia e nun dos xornais de maior circulación na Comunidade Autónoma, e de audiencia aos concellos afectados polo plan ou proxecto.
Ademais, o artigo 5.2 do Decreto 442/1990, do 13 de setembro, de avaliación de impacto ambiental para Galicia, establece que o órgano substantivo procederá a someter o estudo de impacto ambiental ao trámite de información pública durante trinta días hábiles e que se exporá nas oficinas correspondentes ao órgano substantivo, logo de anuncio no Diario Oficial de Galicia.
Polo anterior,
RESOLVO:
Someter a información pública o proxecto sectorial de actividades actividades extractivas, o proxecto de explotación, o plan de restauración e o estudo de impacto ambiental da concesión de explotación Santa Lucía número 4875.1, no concello de Castrelo de Miño, durante o prazo de trinta días hábiles contados a partir da publicación desta resolución no Diario Oficial de Galicia.
Os interesados contarán co citado prazo de trinta días para examinar o proxecto sectorial, que estará dispoñible na Dirección Xeral de Industria, Enerxía e Minas da Consellería de Economía e Industria, na Xefatura Territorial da Consellería de Economía e Industria de Ourense e no portal da Consellería de Economía e Industria
(http://economiaeindustria.xunta.es/expediente-explotacions-mineiras), e presentar ante esta dirección xeral as alegacións que consideren pertinentes.
Santiago de Compostela, 28 de setembro de 2012
Ángel Bernardo Tahoces
Director xeral de Industria, Enerxía e Minas