No Boletín Oficial da provincia de Lugo número 41, do día 19 de febreiro de 2008 publícanse as bases que rexen a aceptación e asunción, por delegación expresa, de competencias en materia de xestión, inspección e recadación en relación a tributos, prezos públicos e outros ingresos de dereito público, así como o alcance e contido da delegación efectuada, entre outros polo Concello de Vilalba, e foi tamén publicado no Diario Oficial de Galicia número 46 do día 5 de marzo de 2008.
No Boletín Oficial da provincia número 286 do día 13 de decembro de 2008 publícase a reforma das citadas bases.
O Concello de Vilalba amplía a delegación de competencias, mediante comunicado do alcalde do día 21 de maio de 2012, que é aceptada pola Deputación de Lugo (Decreto 1853 do día 11.6.2012), segundo o teor literal seguinte:
«Asunto: Xestión, inspección e recadación IVTM.
Para continuar co proceso de adhesión deste Concello ao convenio asinado con ese organismo en materia de xestión, inspección e recadación de tributos e outros, así como en cumprimento dos acordos plenarios do 11.1.2008 sobre delegación de competencias nas ditas materias, e do 30.5.2008 aclaratorio do anterior, no senso de que no caso do imposto municipal de vehículos quedaría en suspenso a efectividade de tal delegación en período voluntario, en canto non se extinguise a obriga existente coa persoa encargada do servizo municipal de recadación, e unha vez efectuados os trámites que regularizaron a súa situación xurídica, a relación contractual extinguiuse o pasado 15.5.2012.
En consecuencia, esta entidade procederá a cumprir integramente o acordo de delegación, tendo plena efectividade o segundo deles, polo que desde este momento e en diante, será a Deputación Provincial o organismo encargado da «xestión, inspección e recadación do imposto sobre vehículos de tracción mecánica», tanto en período voluntario como en período executivo, sendo xa de aplicación ao actual exercicio 2012.
Para isto e co fin de recadar o dito imposto, especialmente o do presente exercicio, esta entidade facilitará toda a información necesaria para levar a cabo as tarefas previas, e en todo momento se prestará calquera colaboración que for precisa, co obxecto de conseguir unha recadación máis áxil e efectiva».
A base décimo terceira (réxime de vixencia), no seu número 3, establece que:
«3. Durante a vixencia da delegación, e sen que afecte o período sinalado nesta, calquera concello poderá ampliar ou seu contido dentro do marco establecido nestas bases, mediante acordo plenario comunicado á Deputación Provincial, e producirá efecto desde a data da súa publicación no BOP e no DOG».
Lugo, 20 de xullo de 2012
P.D. (Decreto nº 2821/2011, do 15 de xullo)
Mª del Pilar García Porto José Antonio Mourelle Cillero
Deputada delegada de Economía, Secretario da Deputación Provincial
Recadación e Facenda de Lugo
