O artigo 57 da Lei 58/2003, do 17 de decembro, xeral tributaria sinala os medios que a Administración tributaria pode utilizar para calcular o valor das rendas, produtos, bens e demais elementos determinantes da obriga tributaria, entre os que cita, na súa letra c), o de prezos medios no mercado. En idéntico sentido pronúnciase o artigo 59 da Lei 16/2007, do 26 de decembro, de orzamentos xerais da Comunidade Autónoma de Galicia para o ano 2008. Esta mesma lei detalla no seu artigo 61.1, cal debe de ser a forma e o contido da norma que desenvolva este medio de valoración.

A Orde da Consellería de Facenda do 28 de decembro de 2011, pola que se aproban os prezos medios no mercado de determinados inmobles rústicos e urbanos situados na Comunidade Autónoma de Galicia para o exercicio 2012, desenvolveu o medio de comprobación de prezos medios no mercado para que poida ser utilizado na aplicación dos tributos xestionados por esta Comunidade Autónoma, cuxa base impoñible sexa o valor real dos bens inmobles. Así, establécese un criterio de valoración obxectivo, común e homoxéneo en todo o territorio, explicándose con detalle o sistema de cálculo utilizado.

O obxectivo desta nova orde é actualizar os prezos recollidos nos anexos da Orde do 28 de decembro de 2011.

De conformidade co disposto no artigo 42.3 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, cando o contido e a repercusión da disposición o aconsellen será sometida a información pública.

Na súa virtude,

RESOLVO:

Someter a información pública, por un prazo de 15 días hábiles contados desde o seguinte ao da publicación desta resolución, o proxecto de orde pola que se modifica a Orde do 28 de decembro de 2011, pola que se aproban os prezos medios no mercado de determinados inmobles rústicos e urbanos situados na Comunidade Autónoma de Galicia para o exercicio 2012.

O proxecto de orde poderase consultar na páxina web da Consellería de Facenda:

http://www.conselleriadefacenda.es/web/portal/disposicions

As posibles alegacións presentaranse durante o prazo sinalado, dirixidas ao director xeral de Tributos, en calquera das oficinas previstas no artigo 38.4 da Lei 30/1992, do 26 de novembro, de réxime xurídico das sdministracións públicas e do procedemento administrativo común.

Santiago de Compostela, 12 de xullo de 2012

Carlos Rodríguez Sánchez
Director xeral de Tributos