O procedemento de modificación dos estatutos das mancomunidades está regulado no artigo 143 da Lei 5/1997, do 22 de xullo, de Administración local de Galicia, en cumprimento do disposto no citado precepto, o presidente da mancomunidade remitiulle á Consellería de Presidencia, Administracións Públicas e Xustiza a documentación relativa á súa modificación.
Examinada a documentación, considérase que a tramitación da modificación estatutaria seguiu o procedemento legalmente previsto para tal fin.
En síntese, para a adopción do acordo de modificación desta mancomunidade observouse a seguinte tramitación:
– A Xunta da Mancomunidade de Concellos da Mariña Luguesa aprobou inicialmente a modificación dos seus estatutos o 1 de marzo de 2010.
– O referido acordo someteuse a información pública durante o prazo dun mes no BOP nº 71 de Lugo, do 29 de marzo de 2010, período en que non se presentaron alegacións.
– Con data 1 de xuño de 2010 e 3 de xuño de 2010 emitiron informe da Deputación Provincial e da Dirección Xeral de Administración Local, respectivamente.
– Os plenos de cada unha das entidades locais integrantes da mancomunidade aprobaron a modificación dos estatutos e remitiron á Dirección Xeral de Administración Local unha copia certificada dos acordos de aprobación da dita modificación.
Segundo o antedito e de conformidade co disposto no artigo 143.1.d) da Lei 5/1997, do 22 de xullo, de Administración local de Galicia, e demais normativa de aplicación
DISPOÑO:
Artigo único
Publicar a modificación da nova redacción dos estatutos da Mancomunidade de Concellos da Mariña Luguesa.
Santiago de Compostela, 18 de xullo de 2012
Alfonso Rueda Valenzuela
Conselleiro de Presidencia, Administracións Públicas e Xustiza
ANEXO
Capítulo I
Disposicións xerais
Artigo 1. Composición e denominación
Coa denominación de Mancomunidade de Concellos da Mariña Luguesa e integrado polos concellos de Abadín, Alfoz, Barreiros, Burela, Cervo, Foz, Lourenzá, Mondoñedo, Ourol, A Pontenova, Ribadeo, Riotorto, Trabada, O Valadouro, O Vicedo, Viveiro e Xove constitúese a dita entidade local, ao abeiro do establecido nos artigos 135 e seguintes da Lei 5/1997, do 22 de xullo, de Administración local de Galicia, e na lexislación básica estatal, con personalidade xurídica propia e capacidade para o cumprimento dos fins específicos establecidos nestes estatutos.
Artigo 2. Domicilio
A sede da Mancomunidade, será a sede do concello de Barreiros, praza do Concello, s/n, 27790 San Cosme de Barreiros (Lugo).
1. Non obstante, a Asemblea Plenaria, ou calquera outro órgano de goberno ou administración, poderá realizar as súas sesións en calquera das sedes das entidades mancomunadas ou das instalacións afectas aos servizos que preste.
2. Os servizos especializados da Mancomunidade poderán instalarse en calquera dos entes mancomunados, a pedimento da Corporación de que se trate ou de oficio segundo o acorde a Asemblea Plenaria da Mancomunidade.
Artigo 3. Ámbito territorial
O ámbito territorial onde a Mancomunidade desenvolverá os seus fins abrangue o territorio dos concellos implicados.
Capítulo II
Obxecto e competencia
Artigo 4. Obxecto e fins
O obxecto ou fin da Mancomunidade será:
a) Prestación parcial ou integral do servizo de recollida selectiva e transporte de residuos e, de ser o caso, cantas outras competencias atribúa a lexislación xeral ou sectorial nesta materia.
b) A xestión e execución de plans, programas ou proxectos de interese público ou común para as entidades mancomunadas e de competencia destas (desenvolvemento industrial e turístico nos termos do artigo 44.2 da Lei 7/1985, do 2 de abril; artigo 36.4 do RDL 781/1986, do 18 de abril e artigo 142.1 da Lei 5/1997, do 22 de xullo LALGA), así como a obtención, xestión e investimento dos correspondentes fondos, en materia de políticas de desenvolvemento rexional, social ou agrícola, no marco das iniciativas europeas, nacionais, autonómicas ou locais, e doutros entes, institucións ou entidades, públicas ou privadas.
c) Asumir a execución de obras relativas a plans, programas ou proxectos, que as administracións mancomunadas ou outras administracións públicas acorden encomendarlle, para a xestión de servizos e actividades de interese público e común, así como a súa creación, instalación e prestación parcial ou integral.
d) Extinción de incendios forestais.
e) Parque de maquinaria para obras públicas e servizos.
f) Asesoramento técnico, asistencia xurídica e soporte técnico de xestión de expedientes e plataforma dixital.
g) Servizos sociais, culturais e deportivos.
Artigo 5. Potestades
A Mancomunidade realizará as súas actividades en nome propio e para o establecemento, conservación, prestación e desenvolvemento dos fins expresados no artigo anterior, e dispoñerá, para tales efectos, de plena competencia, polo que os acordos ou resolucións que adopten os seus órganos de goberno obrigarán a todas as entidades mancomunadas.
Para o cumprimento dos seus fins a Mancomunidade de Concellos da Mariña Luguesa, exercerá as seguintes potestades:
a) A potestade regulamentaria e de autoorganización.
b) A potestade de programación ou planificación.
c) A potestade de investigación, deslindamento e recuperación de oficio dos seus bens.
d) A potestade de lexitimidade e executividade dos seus actos.
e) As potestades de execución forzosa e de sancionar.
f) A potestade de revisión de oficio dos seus actos e acordos.
g) A inembargabilidade dos seus bens e dereitos, nos termos previstos nas leis, e as de prelación, preferencia e demais prerrogativas recoñecidas á Facenda Pública en relación cos seus créditos, sen prexuízo das que lle correspondan á Facenda do Estado e da Xunta de Galicia.
h) Aqueloutras que lle sexan delegadas ou encomendadas por outras administracións públicas.
Capítulo III
Órganos de goberno e administración
Artigo 6. Órganos de goberno
Serán órganos de goberno da Mancomunidade: a Asemblea Plenaria, o presidente e o vicepresidente.
Artigo 7. Órganos complementarios
Serán órganos complementarios da Mancomunidade:
a) Comité consultivo.
b) Xunta de Goberno.
Na sesión constitutiva ou de renovación da Asemblea Plenaria, de entre os seus membros serán elixidos os membros que integrarán a Xunta de Goberno da Mancomunidade, da que formarán parte integrante o presidente/a e vicepresidente/a e tantos vogais coma os restantes concellos aos cales non estean adscritos os anteriores, sendo o seu número de dezasete (un por cada un dos concellos mancomunados). A súa revogación ou cesamento serao do mesmo modo que o nomeamento e, en todo caso, pola extinción ou cesamento no cargo municipal que lexitimou a posibilidade da súa elección.
O Comité Consultivo estará integrado por seis membros, designados e revogados libremente de entre os vogais da Asemblea Plenaria polo presidente, que presidirá o devandito órgano, que asistirán á presidencia no seu mandato. A súa natureza é a asistencia ao presidente no exercicio das atribucións que lle son propias.
Artigo 8. Composición da Asemblea Plenaria
Comporán a Asemblea Plenaria, dous membros da cada unha das corporacións mancomunadas, xa que logo, trinta e catro membros en total serán designados polos concellos mancomunados no número de dous por cada corporación municipal, elixidos libremente de entre os seus membros corporativos no seo do Pleno destes, actuando na representación municipal á cal corresponden e atendendo ao pluralismo político existente en cadansúa corporación local.
Poderán ser revogados do mesmo modo como foron designados, é dicir, por acordo da respectiva entidade municipal, e o seu mandato rematará ou se extinguirá ao cesar no cargo municipal que lexitimou a súa elección ou por motivo de resolución ou acordo da respectiva entidade municipal.
Así mesmo, cesarán de conformidade co establecido no artigo 13.2 destes estatutos.
A representación de cada membro será igualitaria para todos os municipios mancomunados (un membro un voto persoal e indelegable).
Artigo 9. Competencias da Asemblea Plenaria
Corresponden á Asemblea Plenaria da Mancomunidade, por analoxía, cantas competencias sexan atribuídas ao Pleno dos concellos pola normativa vixente en materia de réxime local e sexan de aplicación á Mancomunidade para a consecución dos seus fins, así como, as demais que se lle asignan de seguido:
Corresponderanlle á Asemblea Plenaria, para o desenvolvemento e xestión das actividades e servizos determinados polo obxecto e fins da Mancomunidade, as seguintes atribucións:
a) O control e a fiscalización dos demais órganos de goberno.
b) Os acordos relativos á participación en organizacións supramunicipais; alteración do domicilio, dos seus servizos xerais e os especializados; así como o cambio da súa denominación.
c) A aprobación do regulamento orgánico e das ordenanzas ou regulamentos ou, de ser o caso, a proposta destas ás entidades mancomunadas, así como a creación e regulación de órganos complementarios.
d) A determinación dos recursos propios de carácter tributario; a aprobación e modificación dos orzamentos; a disposición de gastos en materia da súa competencia e a aprobación das contas; todo isto de acordo co disposto na Lei de facendas locais.
e) A aprobación dos plans, programas e proxectos, así como a forma de xestión dos servizos e actividades.
f) A aceptación da delegación de competencias feita por outras administracións públicas.
g) A presentación de conflitos de competencias a outras entidades locais e demais administracións públicas.
h) A aprobación do cadro de persoal e da relación de postos de traballo, a fixación da contía das retribucións do persoal, e o número, características e retribucións do persoal eventual.
i) O exercicio de accións xudiciais e administrativas da Mancomunidade en materias de competencia da Asemblea Plenaria.
j) Coñecer e resolver as reclamacións que formulen as entidades mancomunadas, así como a declaración de lesividade dos actos da Mancomunidade.
k) A alteración da cualificación xurídica dos bens de dominio público.
l) A concertación das operacións de crédito cuxa contía acumulada dentro de cada exercicio económico, exceda o 10 por 100 dos recursos ordinarios do orzamento –agás as de tesouraría, que lle corresponderán cando o importe acumulado das operacións vivas en cada momento supere o 15 por 100 dos ingresos correntes liquidados no exercicio anterior– todo isto de conformidade co disposto na Lei reguladora das facendas locais.
m) As contratacións e concesións de toda clase cando o seu importe supere o 10 por 100 dos recursos ordinarios do orzamento e, en calquera caso, os seis millóns de euros (6.000.000,00 €), así como os contratos e concesións plurianuais cando a súa duración sexa superior a catro anos e os plurianuais de menor duración cando o importe acumulado de todas as súas anualidades supere a porcentaxe indicada, referida aos recursos ordinarios do orzamento do primeiro exercicio e, en todo caso, cando sexa superior á contía sinalada nesta letra.
n) A aprobación dos proxectos de obras e servizos cando sexa competente para a súa contratación ou concesión, e cando aínda non estean previstos nos orzamentos.
ñ) A adquisición de bens e dereitos cando o seu valor supere o 10 por 100 dos recursos ordinarios do orzamento e, en todo caso, cando sexa superior a tres millóns de euros (3.000.000,00 €), así como os alleamentos patrimoniais e gravame de bens e dereitos dos cales a Mancomunidade sexa titular.
o) A aprobación das directrices e normas de réxime interno, dos plans e programas anuais de goberno, administración e dirección da Mancomunidade.
p) A elección de entre os seus membros, de presidente e vicepresidente da Mancomunidade, e o seu cesamento, así como a determinación dos representantes das entidades mancomunadas que, se é o caso, desenvolvan as súas responsabilidades en réxime de dedicación exclusiva ou parcial.
q) A aprobación da modificación dos estatutos, e a proposta de modificación destes ás entidades mancomunadas.
r) A aprobación do regulamento dos servizos que preste a Mancomunidade, que será remitido aos entes mancomunados para o seu coñecemento, así como a adopción da forma concreta de xestión dos servizos da súa competencia.
s) A proposición ás entidades mancomunadas das ordenanzas fiscais, elementos tributarios, taxas, prezos públicos e tarifas que fosen procedentes en relación coas finalidades da Mancomunidade.
t) Aprobar o inventario de bens e dereitos e a memoria anual, dando conta diso ás entidades mancomunadas.
u) A fixación das achegas, sexan ordinarias ou extraordinarias, que obrigatoriamente teñan que efectuar as entidades mancomunadas para o sostemento da Mancomunidade.
v) Propoñer e aprobar a adhesión ou incorporación á Mancomunidade de novas entidades locais, así como a separación dos que a integran.
w) A proposta de disolución da Mancomunidade.
x) Aquelas outras que deban corresponder á Asemblea Plenaria por exixir a súa aprobación unha maioría especial.
y) Calquera outra que se someta á súa consideración por entender que afectan de modo relevante os intereses comúns, e as demais que expresamente lle confiran as leis.
Das atribucións indicadas teñen carácter de delegables as relativas aos puntos que a Lei básica de réxime local outorga aos plenos dos concellos, logo de acordo plenario adoptado no dito sentido.
Artigo 10. Elección de presidente
A Asemblea Plenaria da Mancomunidade, no día da súa constitución ou renovación, elixirá presidente de entre os seus membros, que para a súa elección precisará o quórum da maioría absoluta en primeira votación. De non resultar esta cualificación, procederase á elección nunha segunda votación bastando a maioría simple dos asistentes.
Artigo 11. Competencias do presidente
O presidente, ademais de representar a Mancomunidade, terá por analoxía cantas atribucións son conferidas ao alcalde pola normativa de réxime local cara á consecución dos fins da Mancomunidade e as que se lle asignan de seguido:
a) Dirixir o goberno e a administración, velando polo cumprimento dos estatutos.
b) A representación legal e a sinatura de cantos documentos públicos ou privados sexan necesarios ou útiles para o cumprimento dos seus fins.
c) Convocar e presidir as sesións da Asemblea Plenaria, agás os supostos previstos na lexislación do réxime local, e de calquera outro órgano da Mancomunidade, e decidir os empates con voto de calidade.
d) Dirixir, inspeccionar e impulsar as obras, servizos e actividades, xestionando con entidades públicas e privadas a resolución dos problemas que a afecten, ordenando os informes, estudos e consultas pertinentes.
e) Ditar bandos.
f) O desenvolvemento da xestión económica de acordo co orzamento aprobado, dispoñer gastos dentro dos límites da súa competencia, concertar operacións de crédito, con exclusión das recollidas no artigo 158.5 da Lei 39/1988, do 28 de decembro, reguladora das facendas locais, sempre que aquelas estean previstas no orzamento e cuxo importe acumulado dentro de cada exercicio económico non supere o 10 por 100 dos seus recursos ordinarios, agás as de tesouraría, que lle corresponderán cando o importe acumulado das operacións vivas en cada momento non supere o 15 por 100 dos ingresos liquidados no exercicio anterior; ordenar pagamentos e render contas; todo isto de conformidade co disposto na Lei reguladora das facendas locais.
g) Aprobar a oferta de emprego público de acordo co orzamento e o cadro de persoal aprobados pola Asemblea Plenaria, aprobar as bases das probas para a selección do persoal e para os concursos de provisión de postos de traballo e distribuír as retribucións complementarias que non sexan fixas nin periódicas.
h) Desempeñar a xefatura superior de todo o persoal e acordar o seu nomeamento e sancións, incluída a separación do servizo do persoal da Mancomunidade e o despedimento do persoal laboral, do que conta á Asemblea Plenaria, nestes dous últimos casos, na primeira sesión que realice. Esta atribución entenderase sen prexuízo do previsto na disposición adicional segunda do EBEP e normativa de desenvolvemento.
i) O exercicio das accións xudiciais e administrativas e a defensa da Mancomunidade nas materias da súa competencia, mesmo cando as tivese delegado noutro órgano, e, en caso de urxencia, en materias da competencia da Asemblea Plenaria. Neste suposto daralle conta a esta na primeira sesión que realice para a súa ratificación.
j) A iniciativa de lle propoñer á Asemblea Plenaria a declaración de lesividade en materias da súa competencia.
k) Adoptar persoalmente, e baixo a súa responsabilidade, en caso de catástrofe ou de infortunios públicos e grave risco destes, as medidas necesarias e adecuadas, dándolle conta inmediata á Asemblea Plenaria.
l) Sancionar as faltas de desobediencia á súa autoridade ou por infracción das ordenanzas, agás nos casos en que tal facultade estea atribuída a outros órganos.
m) As contratacións e concesións de toda clase cando o seu importe non supere o 10 por 100 dos recursos ordinarios do orzamento nin, en calquera caso, os seis millóns de euros (6.000.000,00 €); incluídas as de carácter plurianual cando a súa duración non sexa superior a catro anos, sempre que o importe acumulado de todas as súas anualidades non supere nin a porcentaxe indicada, referida aos recursos ordinarios do orzamento do primeiro exercicio, nin a contía sinalada.
n) A aprobación dos proxectos de obras e de servizos cando sexa competente para a súa contratación ou concesión e estean previstos no orzamento.
ñ) A adquisición de bens e dereitos cando o seu valor non supere o 10 por 100 dos recursos ordinarios do orzamento nin os tres millóns de euros (3.000.000,00 €); así como alleamento do patrimonio, para bens inmobles e mobles, sempre que non supere o 10 por 100 dos recursos ordinarios do orzamento nin os tres millóns de euros e que estean previstos no orzamento.
o) Ordenar a publicación, execución e facer cumprir os acordos da Mancomunidade.
p) As demais que expresamente lle atribúan as leis e aquelas que a lexislación do Estado ou das comunidades autónomas lles asignen ás mancomunidades, e non lles atribúan a outros órganos deste.
q) Presentarlle á Asemblea Plenaria os estudos, proxectos e iniciativas de interese para a Mancomunidade, o plan de xestión dos servizos e actividades, así como o estudo, preparación e ditame dos asuntos dos cales, por razón da materia, a súa resolución lle incumba á Asemblea Plenaria.
r) O desempeño das tarefas ordinarias da Mancomunidade, así como a aprobación dos actos necesarios para o seu funcionamento.
s) Coordinar as tarefas da Mancomunidade cos servizos das entidades mancomunadas directa ou indirectamente relacionados coa competencia desta entidade.
t) As funcións que para o desenvolvemento dos servizos lle delegue a Asemblea Plenaria.
u) Calquera outra función non atribuída aos demais órganos de goberno e administración da Mancomunidade.
As competencias que por analoxía ao alcalde atribúense ao presidente exércense segundo a redacción que rexe para os alcaldes.
En caso de ausencia, enfermidade, incapacidade ou vacante do presidente, serán exercidas as súas funcións polo vicepresidente.
O presidente pode delegar aquelas competencias que por analoxía se lle atribúen, pola Lei de réxime local estatal ou autonómica, aos alcaldes presidentes dos concellos e deputacións.
Artigo 12. Designación do vicepresidente
A Asemblea Plenaria da Mancomunidade, conforme o establecido no artigo 146.2 da LALGA, designará e revogará por maioría simple por proposta do presidente, libremente de entre os membros da Asemblea Plenaria, un vicepresidente, que o substituirá nos casos de vacante, ausencia ou enfermidade, e que non poderá recaer nun representante do mesmo concello.
Artigo 13. Renovación dos órganos de goberno
Os órganos de goberno da Mancomunidade serán renovados coa mesma periodicidade que as entidades locais territoriais mancomunadas. Todos os membros dos órganos de goberno da Mancomunidade continuarán en funcións unha vez disoltas as corporacións e mentres non se constitúan as novas ata a constitución de novo de estes órganos.
A perda da condición de membro dun dos entes mancomunados suporá o cesamento como membro dos órganos de goberno da Mancomunidade.
Artigo 14. Da Comisión Especial de Contas
A Mancomunidade contará cunha Comisión Especial de Contas, que se axustará ao previsto na normativa aplicable de réxime local, a súa composición será determinada na sesión constitutiva ou de renovación da Asemblea Plenaria.
Capítulo IV
Réxime xurídico e funcionamento
Artigo 15. Réxime de sesións
A convocatoria, réxime das sesións e actas dos órganos colexiados da Mancomunidade axustarase ao disposto na normativa vixente en materia do réxime local.
A Asemblea Plenaria celebrará sesión ordinaria cada seis meses, cuxa determinación será acordada pola Asemblea Plenaria. Poderanse celebrar sesións extraordinarias mediante convocatoria do presidente, ben por decisión propia ou cando o solicite a cuarta parte, como mínimo, do número legal de membros da Asemblea Plenaria da Mancomunidade.
Artigo 16. Funcionamento da Asemblea Plenaria
A Asemblea Plenaria adoptará os seus acordos por maioría simple, agás aqueles supostos que indica o artigo 47 da Lei 7/1985, do 2 de abril, reguladora das bases de réxime local.
A representación de cada membro será igualitaria para todos os municipios mancomunados (un membro un voto persoal e indelegable).
En caso de empate, efectuarase unha segunda votación e, se persiste o empate, decidirá o voto que emita o presidente, como voto de calidade.
Artigo 17. Obrigatoriedade de acordos
Os acordos que adopten os órganos de goberno da Mancomunidade vincularán a todas as entidades integrantes, sempre que se adopten para o cumprimento dos fins asumidos por este, e salvo que requiran a expresa ratificación de cada un dos entes mancomunados, que procederá nos seguintes casos:
– A disolución da Mancomunidade.
– A admisión de novos membros ou a separación de algún deles.
– A modificación dos estatutos.
Artigo 18. Réxime de acordos
O réxime xurídico aplicable á organización, funcionamento, acordos e resolucións dos órganos da Mancomunidade axustarase ao disposto na normativa de réxime local e do réxime xurídico das administracións públicas, que se desenvolverá conforme os principios de racionalidade, economía e eficiencia da xestión.
Os actos dos diferentes órganos da Mancomunidade ditados no ámbito das súas competencias porán fin á vía administrativa nos casos que dispón o artigo 109 da Lei 30/1992, do 26 de novembro, de réxime xurídico das administracións públicas e do procedemento administrativo común, e serán impugnables en vía administrativa e xurisdicional, de conformidade co establecido na lexislación de réxime local e xeral.
A publicación dos acordos e resolucións da mancomunidade farase nos boletíns e diarios oficiais nos que legalmente proceda.
Capítulo V
Dereitos e deberes dos entes mancomunados
Artigo 19. Dereitos dos entes mancomunados
Os entes mancomunados terán os seguintes dereitos:
a) Participar dos servizos que promova a Mancomunidade.
b) Exercer o dereito de voz e voto na Asemblea Plenaria a través dos seus representantes.
c) A separarse da Mancomunidade voluntariamente, tras o informe favorable da Asemblea Plenaria, por solicitude do Pleno do concello de que se trate mediante resolución motivada, acadada co voto favorable da maioría absoluta, cunha antelación mínima dun ano á finalización do exercicio económico que corresponda, achegando declaración responsable, proporcional e solidaria das obrigas pendentes ao servizo do que veña participando ou do que se comprometera o dito concello, de acordo co disposto no artigo 143.3 da LALGA.
d) Aqueles que a Lei básica do réxime local e da Comunidade Autónoma lles atribúa esencialmente e non se enumeren nestes estatutos.
Artigo 20. Deberes dos entes mancomunados
Os entes mancomunados terán os seguintes deberes:
a) Acatar os presentes estatutos e os acordos validamente adoptados pola Asemblea Plenaria e demais órganos de administración.
b) Aboar as achegas económicas para o financiamento dos distintos servizos mancomunados.
c) A comprometerse a consignar nos seus orzamentos municipais as achegas económicas suficientes para o financiamento das obrigas e compromisos económicos a que aluden os presentes estatutos.
Capítulo VI
Persoal
Artigo 21. Persoal con habilitación estatal
Os postos de secretario, interventor e tesoureiro, que serán cubertos por funcionarios con habilitación de carácter estatal, crearanse e clasificaranse como propios e independentes, de conformidade co establecido na Lei 7/2007, do 12 de abril, e no Decreto 49/2009, do 26 de febreiro, e restante normativa específica que afecta estes funcionarios.
Artigo 22. Persoal ao servizo da Mancomunidade
Para o desenvolvemento das funcións e traballos administrativos a Mancomunidade poderá contar con persoal propio, segundo se especifique no cadro de persoal que se aprobe anualmente xunto co orzamento da Mancomunidade, con suxeición ao establecido na lexislación de réxime local, na lexislación básica estatal e normativa autonómica de aplicación.
Capítulo VII
Facenda
Artigo 23. Réxime económico
A Asemblea Plenaria aprobará anualmente un orzamento único, axustado na súa elaboración, forma e desenvolvemento, ás disposicións que rexen na lexislación de réxime local.
Artigo 24. Recursos económicos
A facenda da Mancomunidade estará constituída polos seguintes recursos:
a) Ingresos procedentes do seu patrimonio e demais de dereito privado.
b) Subvencións e outros ingresos de dereito público.
c) As subvencións, contribucións, e transferencias de calquera entidade pública ou privada, incluíndo os fondos estruturais, de cohesión, ou calquera outro, procedentes da Unión Europea, tales como Feder, Feoga, FSE, que coadxuven ao obxecto e fins relacionados no artigo 4.
d) Subvencións a fondo perdido, que poden ser outorgadas pola Xunta de Galicia, nos termos establecidos polo artigo 136.1 252 b) da Lei 5/1997, do 22 de xullo, de Administración local de Galicia:
e) As contribucións económicas ordinarias ao orzamento por parte das entidades mancomunadas.
f) As taxas e prezos públicos que se establezan para a prestación de servizos ou realización de actividades da súa competencia.
g) Contribucións especiais pola execución de obras ou polo establecemento, ampliación ou mellora de servizos da competencia das entidades mancomunadas.
h) O produto das operacións de crédito.
i) O produto de multas e sancións no ámbito das súas competencias.
j) Outros recursos que a lexislación de facendas locais recoñece a favor das entidades locais.
k) As demais prestacións de dereito público.
1. Tamén constituirán recursos da Mancomunidade as contribucións económicas extraordinarias das entidades mancomunadas.
2. É aplicable aos recursos da Mancomunidade o disposto na Lei de facendas locais, respecto aos recursos dos concellos, coas particularidades propias do seu obxecto e fins.
3. O réxime financeiro da Mancomunidade non alterará o propio dos concellos que o integran.
Artigo 25. Xestións, liquidación, inspección e recadación de tributos
A xestión, liquidación, inspección e recadación dos tributos que estableza a Mancomunidade realizaranse de acordo co previsto na Lei xeral tributaria e nas demais leis do Estado reguladoras da materia, así como as disposicións ditadas para o seu desenvolvemento.
Artigo 26. Infraccións, sancións e recargas
Será aplicable aos tributos que estableza a Mancomunidade o réxime de infraccións, sancións e recargas regulado na Lei xeral tributaria e nas disposicións ditadas para o seu desenvolvemento.
Artigo 27. Contribucións económicas
1. Contribucións económicas ordinarias.
As contribucións económicas ordinarias anuais de cada entidade mancomunada calcularanse en función da poboación de cada concello resultante do último padrón aprobado o 31 de decembro, segundo datos oficiais proporcionados polo Instituto Nacional de Estatística.
2. Contribucións económicas extraordinarias.
As contribucións económicas extraordinarias anuais de cada entidade mancomunada calcularanse segundo acorde a incorporación do servizo por acordo de maioría simple da Asemblea Plenaria, restante en función da repercusión dos servizos en cada unha das entidades mancomunadas. Para o cobramento das achegas ás entidades mancomunadas será requisito indispensable a efectiva prestación dos servizos por parte da Mancomunidade, polo que aquelas entidades que por renuncia, baixa ou outros motivos, non reciban a prestación dun ou mais servizos non terán a obriga de contribuír ao custo destes.
3. Para o ano 2009 e sucesivos as contribucións ordinarias respectarán as porcentaxes provisionais de contribución, que se corresponderán cos datos achegados polo INE, referidos á poboación de cada un dos concellos.
4. Os concellos mancomunados consignarán nos seus orzamentos as cantidades precisas para atender, nos sucesivos exercicios económicos, as obrigacións derivadas dos compromisos contraídos coa mancomunidade a que pertenzan. Transcorrido o prazo para o ingreso das achegas dos municipios que integran a Mancomunidade, o seu presidente poderá dirixirse á Comunidade Autónoma para a retención dos fondos do municipio debedor e o seu ingreso na facenda da mancomunidade
Artigo 28. Financiamento dos servizos e das actividades
Para a execución das obras e a prestación de servizos e actividades redactarase o correspondente proxecto, memoria valorada e informe técnico, determinándose o sistema de financiamento que proceda, en consonancia cos recursos sinalados nos presentes estatutos.
Artigo 29. Aprobación do orzamento
1. A Mancomunidade aprobará anualmente un orzamento único, comprensivo das obrigas que, como máximo, poderá recoñecer durante o correspondente exercicio económico, e dos dereitos que se prevexa liquidar no mesmo período.
2. O dito orzamento axustarase no seu contido, estrutura, tramitación e aprobación ao establecido pola Lei de facendas locais e disposicións que a desenvolvan.
Artigo 30. Previsión dos gastos e ingresos
1. Todas as contribucións económicas ordinarias, referidas no punto 1 do artigo anterior, serán efectuadas polas entidades mancomunadas mediante entregas periódicas, que se ingresarán con anterioridade ao último día de cada trimestre natural na tesouraría da Mancomunidade, ou en calquera outro prazo fixado por acordo da Asemblea Plenaria.
2. En caso de que as entregas referidas no punto anterior non se efectúen nos prazos previstos, co obxecto de regularizar os ingresos das contribucións das entidades mancomunadas, estas:
a) Facultan o presidente da Mancomunidade para que, transcorrido o prazo para o ingreso das contribucións das entidades mancomunadas, e acreditada a débeda polo seu secretario, logo de informe da tesouraría e da intervención, poida dirixirse á Administración central ou á Comunidade Autónoma para a retención dos fondos ou cotas pendentes con cargo ás cantidades que por calquera concepto fosen liquidadas a favor da entidade mancomunada debedora, por igual importe ao das contribucións non satisfeitas trimestralmente, para o seu ingreso na facenda da Mancomunidade.
b) Recoñéceselle, á Deputación Provincial de Lugo, a facultade de reter o importe das cantidades debidas con calquera crédito que a favor da entidade mancomunada se dispoña na Corporación Provincial, transferindo as ditas cantidades á Mancomunidade. Esta retención solicitaraa o presidente da Mancomunidade, sinalando o importe da débeda e data de vencemento, que deberán acreditarse mediante certificación da secretaría, logo dos informes do tesoureiro e interventor, sobre o importe pendente de ingresar.
3. Nos casos previstos no número anterior do presente artigo, con carácter previo, darase audiencia á entidade afectada, requiríndolle do pagamento por prazo de dez días.
4. No suposto de que algunha entidade mancomunada lle deba á Mancomunidade dous trimestres da súa contribución, a presidencia asinará resolución, logo de audiencia ao afectado, pola que se acorde deixar de prestar os servizos e actividades.
5. O mesmo réxime dos puntos anteriores aplicarase ás contribucións económicas extraordinarias, que se terán que ingresar na tesouraría da Mancomunidade no prazo máximo dun mes desde a notificación do pertinente acordo da Asemblea Plenaria.
6. As contribucións das entidades mancomunadas consideraranse ingresos de carácter público da Mancomunidade para todos os efectos legais.
Artigo 31. Demora no ingreso de contribucións
As cantidades que non fosen ingresadas na tesouraría da Mancomunidade na data de vencemento fixada no artigo anterior, incrementaranse en proporción ao tempo transcorrido ata o seu pagamento efectivo coa cantidade que resulte de aplicar o xuro de demora fixado pola Lei de orzamentos xerais do Estado para o exercicio correspondente.
Artigo 32. Xestión orzamentaria
Será igualmente aplicable o disposto pola Lei de facendas locais, en materia de créditos e as súas modificacións, xestión e liquidación do orzamento, coas peculiaridades propias da Mancomunidade.
Artigo 33. Tesouraría da Mancomunidade
A tesouraría da Mancomunidade rexerase polo disposto da Lei de facendas locais e, en canto lle sexa de aplicación, polas normas do título V da Lei xeral orzamentaria.
Artigo 34. Contabilidade
A Mancomunidade levará a súa contabilidade de conformidade coa instrución de contabilidade para a Administración local ordinaria.
Artigo 35. Rendición de contas
A Mancomunidade, coas peculiaridades derivadas da súa finalidade e estrutura orgánica, elaborará e renderá as contas anuais nos termos sinalados polos artigos 189 a 193 da Lei de facendas locais.
Artigo 36. Fiscalización
A xestión económica da Mancomunidade será obxecto das fiscalizacións interna e externa reguladas pola Lei de facendas locais.
Capítulo VIII
Duración da Mancomunidade, modificación dos estatutos, separación e incorporación de membros e disolución da Mancomunidade
Artigo 37. Duración temporal
A Mancomunidade terá unha duración por tempo indefinido, xa que logo, o carácter dos fins que se perseguen son permanentes.
Artigo 38. Disolución
1. A disolución da Mancomunidade poderá ter lugar polas seguintes causas:
– Por disposición legal.
– Por acordo da Asemblea Plenaria co quórum establecido nestes estatutos.
– Por desaparición do fin para o cal se constituíu.
2. O procedemento de disolución regularase de conformidade co previsto na Lei 5/1997, do 22 de xullo, de Administración local de Galicia.
3. A disolución da Mancomunidade comporta a liquidación do seu patrimonio e a adxudicación dos seus bens e persoal ás entidades integrantes en proporción ás súas respectivas achegas.
Para estes efectos crearase unha comisión liquidadora que fará un inventario de bens, servizos e dereitos da Mancomunidade, cifrará os seus recursos, cargas e débedas e relacionará o seu persoal e proporá á Asemblea Plenaria da Mancomunidade a oportuna distribución ou integración deles nos entes mancomunados, de conformidade cos datos que servisen para a formación do patrimonio. A proposta de liquidación para ser aprobada requirirá o voto favorable da maioría absoluta da Asemblea Plenaria. Unha vez aprobada, a proposta será vinculante para os entes mancomunados.
Artigo 39. Modificación dos estatutos
Para a modificación dos estatutos seguirase o procedemento previsto no artigo 143 da Lei 5/1997, do 22 de xullo, de Administración local de Galicia.
Artigo 40. Incorporación novos membros
A incorporación de novos membros á Mancomunidade levará consigo a modificación dos estatutos conforme o disposto no artigo 143 da Lei 5/1997, do 22 de xullo, de Administración local de Galicia.
A dita incorporación pode selo para un ou varios dos servizos que se determinen polo concello que se adhira dos previstos no artigo 4.
Artigo 41. Separación de membros
A separación dunha entidade mancomunada levará consigo a modificación dos estatutos conforme o artigo 143 da Lei 5/1997, do 22 de xullo, de Administración local de Galicia.
No caso de que unha entidade decida unilateralmente separarse da Mancomunidade deberá manifestalo cun ano de antelación, contado desde a correcta comunicación á Mancomunidade do acordo de separación, sen deixar de cumprir cos compromisos contraídos durante ese tempo; compromisos consistentes, entre outros extremos, tanto en gastos correntes como en operacións de crédito concertadas a longo prazo que tivesen como obxecto o pagamento de tales gastos producidos durante o tempo en que a entidade mancomunada que se separa aínda pertenza á Mancomunidade.
Dereito supletorio
En todo o non previsto nos presentes estatutos será de aplicación a Lei 5/1997, do 22 de xullo, de Administración local de Galicia, a Lei 7/1985, do 2 de abril, e demais normativa sobre réxime local aplicable.
Disposición adicional
Para o cumprimento dos seus fins, a Mancomunidade poderá valerse dos servizos administrativos e técnicos de calquera das entidades locais mancomunadas, coa conformidade do concello que cede o persoal e do empregado público ao cal se acumulan as funcións, segundo a lexislación vixente.
