Actualmente a Axencia Galega de Infraestruturas ten planificadas diversas actuacións na península do Morrazo con diverso grao de actuación. Para acadar unha visión de conxunto, evitar duplicacións e análises parciais, convén someter ó trámite de información pública conxunta as actuacións previstas:
1. Plan de mobilidade viaria da península do Morrazo.
2. Conversión en autovía do corredor do Morrazo CG-4-1. Treito: enlace de Rande-enlace de Cangas.
3. Variantes de Cangas e Moaña.
O Plan de mobilidade viaria da península do Morrazo, a través da diagnose da situación actual da rede e a definición de obxectivos, establece as actuacións prioritarias para mellorar a mobilidade na zona.
1. O proxecto de trazado da obra de conversión en autovía do corredor do Morrazo CG-4-1. Treito: enlace de Rande-enlace de Cangas, clave PO/12/070.01, foi aprobado provisionalmente por Resolución da Axencia Galega de Infraestruturas do 14 de xuño de 2012.
A Xunta considera fundamental a actuación de desdobramento do corredor do Morrazo para solventar os problemas de capacidade e seguridade viaria do corredor e mellorar a estrutura territorial de comunicacións da comarca do Morrazo co eixo atlántico. A solución que se vai desenvolver toma como base o definido no proxecto de trazado da obra desdobramento do corredor CG-4-1 do Morrazo, clave PO/07/047.01, realizándolle unha serie de modificacións de trazado, para contar cunha alternativa máis optimizada. Así mesmo, aínda que a solución que agora se propón ten un menor impacto ambiental que a solución inicial, que non foi necesario someter ao trámite de avaliación de impacto ambiental, por Resolución do 30 de xullo de 2009, da Secretaría Xeral de Calidade e Avaliación Ambiental, simultaneamente e para maior garantía procesual desta información pública, estanse a tramitar as consultas ambientais previas pola Secretaría Xeral de Calidade e Avaliación Ambiental.
O obxecto do presente proxecto de trazado consiste na primeira fase de execución da duplicación da calzada do actual corredor do Morrazo CG-4-1, que vai desde o seu inicio en Rande (no enlace de conexión coa autopista AP-9 e as estradas PO-551 e N-554) ata o quilómetro 11,1 do enlace de Cangas coa VG-4.5.
2. O proxecto de trazado e impacto ambiental da obra variantes de Cangas e Moaña, clave PO/07/220.01, foi aprobado provisionalmente por Resolución da Axencia Galega de Infraestruturas do 10 de xullo de de 2012.
Os viais desenvolvidos neste proxecto xorden da necesidade de reordenar o tráfico existente que actualmente transita pola estrada PO-551 (entre a N-554 en Rande e Bueu), que atravesa os núcleos de Moaña e Cangas, cun entorno moi densamente poboado e con frecuente presenza de edificacións en ambas marxes da estrada. Os viais definidos neste proxecto xustifícanse por supor unha mellora significativa nas comunicacións dos concellos de Cangas e Moaña, xerando unha considerable mellora na seguridade vial, fluidez nos desprazamentos, redución dos tempos de percorrido e incremento da calidade de vida dos veciños do entorno, ao tempo que se integran adecuadamente no planeamento previsto e complementan o corredor do Morrazo.
Considerando todo o exposto e o establecido na normativa vixente,
RESOLVO:
Primeiro. Someter a consultas o Plan de mobilidade da península do Morrazo para os efectos de determinar as actuacións viarias a executar.
Segundo. Someter ao trámite de información pública segundo o determinado no artigo 15.1 da Lei 4/1994, do 14 de setembro, de estradas de Galicia, os proxectos de trazado de conversión en autovía do corredor do Morrazo CG-4-1. Treito: enlace de Rande-enlace de Cangas, clave PO/12/070.01 e das variantes de Cangas e Moaña, de clave PO/07/220.01.
Terceiro. Así mesmo, durante este período sométese ao trámite de información pública o estudo de impacto ambiental das variantes de Cangas e Moaña, segundo o disposto no Decreto 442/1990, do 13 de setembro, de avaliación de impacto ambiental para Galicia e no Real decreto lexislativo 1/2008, do 11 de xaneiro, polo que se aproba o texto refundido da Lei de avaliación de impacto ambiental de proxectos.
Cuarto. Que simultaneamente ao trámite sinalado no parágrafo anterior, e para os efectos previstos no artigo 56.1 do Regulamento de expropiación forzosa, se somete a información pública a relación individual de bens, dereitos e propietarios afectados pola realización das obras correspondentes aos proxectos de trazado das obras de referencia, para que os afectados presenten cantas alegacións ou rectificacións consideren convenientes en canto aos bens e dereitos descritos nas relacións anexas.
Quinto. O período de información pública será de trinta días hábiles, contados a partir do día seguinte ao da publicación deste anuncio no Diario Oficial de Galicia; estando os proxectos de trazado expostos ao público nas oficinas da Axencia Galega de Infraestruturas en Santiago de Compostela, no Servizo da Axencia Galega de Infraestruturas de Pontevedra e nos concellos de Cangas e Moaña. A exposición do Plan de mobilidade viaria realizarase nas oficinas da Axencia Galega de Infraestruturas en Santiago de Compostela, no Servizo da Axencia Galega de Infraestruturas de Pontevedra e nos concellos de Cangas, Moaña, Bueu, Marín, Pontevedra e Vilaboa.
Así mesmo, na páxina web da Consellería de Medio Ambiente, Territorio e Infraestruturas (http://www.cmati.xunta.es/tema/c/Infraestruturas_Estradas), atópase a disposición dos interesados un documento resumo dos referenciados proxectos.
Santiago de Compostela, 26 de xuño de 2012
Ethel Vázquez Mourelle
Directora da Axencia Galega de Infraestruturas
