A Alcaldía mediante Resolución 365 de 13 de abril de 2012 procedeu á aprobación das bases que rexerán a convocatoria da XXX edición do Premio de Novela Longa Eduardo Blanco Amor, que transcritas literalmente din:
«Réxime xurídico.
Esta convocatoria rexerase polo disposto na Lei 38/2003, xeral de subvencións, no Real decreto 887/2006, polo que se aproba o Regulamento xeral de subvencións e polo resto de lexislación que lle resulte aplicable.
A presente convocatoria efectúase de conformidade coa Ordenanza xeral de subvencións do Concello de Fene, aprobada polo Pleno en sesión do 30 de marzo de 2007 e publicada no BOP número 135, do 15 de xuño.
Consideracións xerais.
Primeira. O premio estará dotado con 12.020 euros, que se imputará á aplicación orzamentaria 334/48000 do orzamento do 2011, prorrogado.
Segunda. Poderán participar nel todos os autores e autoras, de calquera nacionalidade, que presenten unha ou varias obras escritas en lingua galega segundo a normativa oficial.
Terceira. As novelas terán unha extensión mínima de 150 folios mecanografados ou escritos en ordenador (tamaño de fonte 12) a unha soa cara e a dous espazos ou de 75 folios mecanografados ou escritos en ordenador (tamaño de fonte 12) a dúas caras e a dous espazos.
Cuarta. As obras presentadas terán que ser inéditas.
Quinta. De cada obra presentaranse cinco copias asinadas cun lema, en paquete sen remite dirixido á concelleira de Cultura do Concello de Fene, avenida de Naturais, 44, entresollado, 15500 Fene, facendo constar no exterior «Para o XXX Premio Blanco Amor». Nun sobre anexo, pechado e baixo o mesmo lema, indicaranse o nome e enderezo do autor ou autora e, de ser posible, o seu teléfono e enderezo electrónico.
Sexta. O prazo de admisión dos orixinais rematará o día 28 de setembro de 2012. O ditame do xurado darase a coñecer no mes de novembro de 2012.
Sétima. O xurado do premio, nomeado nesta convocatoria polo Concello de Fene, estará composto por cinco membros que serán: editores/as, libreiros/as, escritores/as ou críticos/as literarios/as da literatura galega.
Oitava. O premio poderase declarar deserto, de non existiren obras de calidade adecuada a xuízo do xurado. Neste caso, o importe destinarase a divulgar a obra de Eduardo Blanco Amor entre as escolas e os centros culturais de Galicia.
Novena. O xurado fará públicas as razóns en que se fundou para a concesión do premio.
Décima. A concesión do premio non implicará cesión dos dereitos de propiedade sobre a obra premiada. As obras non premiadas devolveranse aos/ás autores/as que o soliciten, no prazo dun mes, contando desde o día do veredicto. Os gastos de devolución serán por conta dos/as autores/as. En caso de non recollerse dentro deste prazo, os orixinais serán destruídos.
Décimo primeira. A entrega do premio terá lugar nos meses de novembro/decembro de 2012, nun acto público que se convocará oportunamente.
Décimo segunda. O feito de concorreren a este premio presupón que os/as autores/as aceptan as súas bases.
Décimo terceira. Nos aspectos non recollidos nestas bases decidirá a entidade organizadora».
Fene, 13 de abril de 2012
Gumersindo Pedro Galego Feal
Alcalde
