Dentro do plan de actividades da Escola Galega de Administración Pública para o ano 2012 e de acordo coas funcións atribuídas pola Lei 4/1987, do 27 de maio, de creación da Escola, e pola Lei 10/1989, do 10 de xullo, de modificación da anterior, convócase, en colaboración co Colexio de Arquitectos de Galicia e coa Dirección Xeral de Administración Local, a Xornada sobre réxime xurídico do solo rústico e solo de núcleo rural, conforme as seguintes bases:
1. Obxectivos.
Difundir as novidades lexislativas en materia de urbanismo en relación co réxime xurídico do solo rústico e solo de núcleo rural e analizar a problemática que xera a súa aplicación.
2. Contidos.
Serán tratados, entre outros, os seguintes temas:
– Posibilidades edificatorias en solo rústico.
– Problemática en solo rústico: segregacións, parcelacións, legalizacións.
– Solo rústico e normativa sectorial: distancia a plantacións, augas, patrimonio histórico-artístico.
– Tipificación do solo de núcleo rural.
– A problemática de actuación sobre solo rústico.
3. Destinatarios.
Arquitectos, técnicos das diferentes administracións públicas vinculados co urbanismo e interesados en xeral.
4. Desenvolvemento.
Esta xornada desenvolverase na Escola Galega de Administración Pública (EGAP) o día 5 de xuño de 2012.
Duración: 6 horas lectivas, en horario de mañá e tarde.
5. Número de prazas.
Limitado pola capacidade do local.
6. Solicitudes.
http://www.coag.es/formacion
7. Prazo.
O prazo de presentación de solicitudes finalizará o luns 4 de xuño de 2012.
8. Modificacións.
A EGAP reserva para si a facultade de interpretar e de resolver as incidencias que poidan xurdir no desenvolvemento desta xornada, así como a facultade de cancelala se o escaso número de solicitudes non xustificase a súa realización.
9. Certificado de asistencia.
Entregarase un certificado de asistencia, ao final da xornada, a aquelas persoas inscritas que participasen asiduamente, e sempre que a súa asistencia sexa igual ou superior ao 85% das horas lectivas programadas. Neste documento aparecerán de forma expresa o contido, a data e o lugar de realización desta xornada.
Santiago de Compostela, 22 de maio de 2012.
Pablo Figueroa Dorrego
Director da Escola Galega de Administración Pública