1. Alcance da información pública. Lexislación.
Sométese a información pública a solicitude presentada por Iberdrola Energías Renovables de Galicia, S.A., de declaración de utilidade pública do parque eólico Alto do Rodicio.
A lexislación que basicamente é de aplicación para os efectos anteriores é a seguinte: Lei 54/1997, do 27 de novembro, do sector eléctrico, e Real decreto 1955/2000, do 1 de decembro, que a desenvolve; Decreto 302/2001, polo que se regula o aproveitamento da enerxía eólica na Comunidade Autónoma de Galicia, de aplicación ao expediente polo sinalado na disposición transitoria cuarta da Lei 8/2009, do 22 de decembro, pola que se regula o aproveitamento eólico en Galicia e se crean o canon eólico e o Fondo de Compensación Ambiental (DOG do 29 de decembro) e a Lei de expropiación forzosa do 16.12.1954 e o seu Regulamento do 26.4.1957.
2. Características do proxecto.
a) Peticionario: Iberdrola Energías Renovables de Galicia, S.A.
b) Enderezo do peticionario: parque empresarial Novo Milladoiro, Oliveira, 96 B, 15895 Milladoiro, Ames (A Coruña).
c) Denominación: parque eólico Alto do Rodicio.
d) Situación: concellos de Montederramo e Xunqueira de Espadanedo (Ourense).
Coordenadas poligonais en unidades UTM:
Punto 1 (613.000, 4689000); punto 2 (612000, 4690000); punto 3 (612000, 4691000); punto 4 (615500, 4691000); punto 5 (615500, 4687000); punto 6 (615000, 4687000); punto 7 (615000, 4686000); punto 8 (614000, 4686.000); punto 9 (614000, 4689000).
e) Finalidade: produción de enerxía eléctrica a partir da enerxía eólica.
f) Datos técnicos:
– Conxunto de 7 aeroxeradores (G87) de 2.000 kW/u, que suman unha potencia bruta total de 14 MW, equipados con turbina, multiplicador e xerador eléctrico situados no alto dunha torre de aceiro de 78 metros de altura, cimentada sobre zapata de formigón armado.
– Interconexión dos aeroxeradores con dous circuítos eléctricos enterrados, a 20 kV, independentes entre si, que transportan a enerxía ata a subestación transformadora, 220/20 kV do parque eólico de Sil; circuíto AR-1 (para os aeroxeradores números 7, 6 e 3) e circuíto AR-2 (para os números 5, 4, 2 e 1).
– C.T. que se instalará en cada aeroxerador de 2.300 kVA de potencia e R/T 0,69-0,48/20 kV, cos elementos de protección e auxiliares necesarios.
– Sistemas de control e supervisión.
– Ampliación da subestación transformadora Sil 220/20 kV coa dotación dunha nova cela de liña a 20 kV, no módulo 1, que evacúa no transformador T-1, para o P.E. Nogueira de Ramuín. Conexión do P.E. Alto do Rodicio á cela de reserva no módulo 2. Implementación de aparellos de medida, mando, control e dispositivos de protección e seguridade correspondentes.
3. Urxente ocupación. A petición de declaración de utilidade pública presentada, ao abeiro do título IX da Lei 54/1997, levará implícito en todo caso, segundo o seu artigo 54, a necesidade de ocupación dos bens ou de adquisición dos dereitos afectados –os cales se describen na relación adxunta– e implicará a urxente ocupación para os efectos do artigo 52 da Lei de expropiación forzosa.
4. Alegacións.
Os interesados e os seus representantes poden examinar o expediente nas oficinas desta xefatura territorial, rúa Curros Enríquez, 1, 3.º, de Ourense, e presentar, de ser o caso, as alegacións que consideren oportunas no prazo de vinte días, contados a partir da última publicación deste anuncio.
Esta publicación realízase igualmente para os efectos do artigo 59.4 da Lei 30/1992, do 26 de novembro, de réxime xurídico das administracións públicas e do procedemento administrativo común, cando os titulares dos predios propostos sexan descoñecidos ou se ignore o lugar de notificación, con traslado ao Ministerio Fiscal das dilixencias que se produzan.
Ourense, 21 de xullo de 2011.
Gabriel Diéguez Domínguez
Xefe territorial de Ourense