Por Acordo do Pleno, con data do 29 de decembro de 2011, aprobouse definitivamente o estudo de detalle referido á determinación da aliñación oeste dun tramo da travesía de Colón, comprendido entre as rúas Emilia Pardo Bazán e Mariñeiro Chila, o que se publica para os efectos do artigo 92 da Lei 9/2002, do 30 de decembro, de ordenación urbanística e protección do medio rural de Galicia.

«3. Aprobación definitiva do estudo de detalle de determinación de aliñación oeste dun tramo da travesía de Colón, comprendido entre as rúas Emilia Pardo Bazán e Mariñeiro Chila, promovido por Restaurante A Marexada, S.L.

Primeiro. Desestimar a alegación presentada por José Ramón Varela Puga, en relación co expediente de aprobación de estudo de detalle polos motivos expresados no informe dos servizos técnicos, con data do 19.12.2011 que se transcribe no seu literal:

En relación co asunto de referencia vistas as alegacións presentadas por José Ramón Varela Puga (rexistro de entrada n.º 6800, do 15 de decembro de 2011) o técnico municipal que subscribe

INFORMA:

O obxecto do estudo de detalle é a sinalización con máis concreción sobre a planimetría actualizada da aliñación fixada das normas subsidiarias de planeamento municipal para a parte oeste do tramo da travesía de Colón que discorre entre as rúas Emilia Pardo Bazán e Mariñeiro Chila.

O estudo de detalle clarifica e concreta a aliñación oeste do tramo sinalado da travesía de Colón axustándose ao grafado na cartografía das normas subsidiarias de planeamento municipal (que foron aprobadas definitivamente pola Comisión Superior de Urbanismo de Lugo con data do 11.11.1981).

E o informe que se emite, sen prexuízo doutro mellor fundado.

Segundo. Aprobar definitivamente o estudo de detalle referido á determinación da aliñación oeste dun tramo da travesía de Colón, comprendido entre as rúas Emilia Pardo Bazán e Mariñeiro Chila.

Terceiro. Publicar o acordo de aprobación definitiva no Diario Oficial de Galicia, e o texto dos documentos que o integran así como o índice de planos do estudo de detalle no Boletín Oficial da provincia.

Cuarto. Notificar este acordo aos propietarios e demais interesados directamente afectados polo estudo de detalle.

Quinto. Comunicar á consellería competente en materia de urbanismo e ordenación do territorio a aprobación do estudo de detalle de referencia á vez que se lle dá traslado dunha copia autenticada de dous exemplares del mesmo con todos os planos e documentos que o integran.

Sexto. Facultar o alcalde presidente para subscribir e asinar toda clase de documentos e en xeral para todo o relacionado con este asunto».

Contra o acordo do pleno, que pon fin á vía administrativa, pode interpor alternativamente ou recurso de reposición potestativo, no prazo dun mes contado desde o día seguinte á publicación deste anuncio, ante o Pleno deste Concello de Foz, de conformidade cos artigos 116 e 117 de Lei de réxime xurídico e procedemento administrativo común, ou recurso contencioso-administrativo, ante a Sala do Contencioso-Administrativo do Tribunal Superior de Xustiza de Galicia, no prazo de dous meses contados desde o día seguinte ao da publicación deste anuncio de conformidade co artigo 46 da Lei da xurisdición contencioso-administrativa. Se se optase por interpor o recurso de reposición potestativo, non poderá interpor recurso contencioso-administrativo ata que aquel sexa resolto expresamente ou se producise a súa desestimación por silencio. Todo iso sen prexuízo de que poida exercitar calquera outro recurso que estime pertinente.

Foz, 9 de xaneiro de 2012.

Javier Jorge Castiñeira
Alcalde presidente